لكل الأدباء الشباب هذا أعلان لكم .. لقائنا اليوم في فقرة لقاء مع أديب 2000 ..مع أميرة من أميرات الحروف .. أميرة بكل المعاني الجميله .. كلمتها في الحب ممكن نعمل منها دواوين ودواوين .. اتعلمنا منها ازاي نعبر عن اللي جوانا بطريقة سهله وبسيطه .. النهاردة معانا ومشرفانا الجميله .. اميرة الحروف أميرة رزق ..
** منة عامر : اهلاً وسهلاً بيكي معانا في مجلة أدباء 2000 ..
** أميرة رزق : حببتي بداية جميله .. يسلم ايديكي
** منة عامر : دي أقل حاجه ليكي طبعا احنا بنتشرف باللقاء مع كاتبة متميزة زي حضرتك ..
** أميرة رزق: أشكرك ولو انى لسة ببتدي اول خطواتى فى عالم بتنفس فيه من خلال الحروف ..
** منة عامر : وعشان كدة هبدأ أسئلتي واقولك عرفينا من هي أميرة رزق ؟
** أميرة رزق : إنسانة عادية جدا ليها احلام و امنيات زى كتير مننا ضيعت وقت كتير و هى بتلاقيها و فجأة اكتشفت ان الوقت الباقى ممكن لا يكفي انها تحققها ..
** منة عامر : اكيد لكل أنسان احلامه بس دايما لما بنقرأ في كتب أنس الفيقي مثلاً بيدينا أمل اننا نحقق احلامنا حتى لو باقي من الوقت ساعات المهم اننا نحاول .. هل ياترى أيه هي أحلام اميرة رزق ؟
** أميرة رزق : انى اعيش....اضحك من قلبى .......افرح بدون خوف ان الفرحة تضيع.....احضن الحياة من غير قلق انها تروح منى....اشبع من اللى بحبهم.........اتطمن ..
** منة عامر : مسار أميرة رزق ياترى شايفه أنه لو فضلتي ماشيه في نفس المسار ده هتحققي احلامك ؟
** أميرة رزق : بصراحة لأ......لأنه المسار الروتينى للحياة اللى عارفاها و اتعودت اعيشيها زى ما هيا متاحة و ممكنة.......انما لو هحقق احلامى محتاجة أغير المسار فى اتجاه معاكس تماما يتناسب مع احلامى ولا يناسب الواقع و الظروف و رواسخ كتير اتفرضت علينا بالقوة محتاجين نكسرها فى اللى حوالينا قبل ما نكسرها فينا... معادلة صعبة.. لكن مش مستحيلة ..
** منة عامر : أخذتي على نفسك عهد قبل كدة في اي حاجه حصلتلك في حياتك ؟
** أميرة رزق : آه اكيد ..
** منة عامر : كان ايه هو العهد ؟
** أميرة رزق : انى اتغير واساعد نفسى فى تحقيق احلامى ..
** منة عامر : لو سئلتك عن ولادك ياترى هاتنمي فيهم موهبة الشعر والخواطر والكتابه بصفه عامة .. ولا انتي عايزاهم يبقوا حاجه تاني بعيدا عن الكتابه يعني مثلا بتتمني انهم يسلكو مسار مثلا في السيلك الدبلوماسي او الطب او اي شيئ بعيداً عن الكتابه وتبقى الكتابه موهبة وقت فراغ مش اكتر ؟
** أميرة رزق : طبعا بحاول أنمى فيهم القرآءة و محاولة التعبير بكل الصور لكن بدون ما افرض مسار عليهم تماما رأيى أن المسار اللى الانسان بيختارة بمحض إرادته بيبدع فيه لكن المسار المفروض عليه من المستحيل ينجح فيه ..
** منة عامر : والله يا استاذة أميرة ياريت كل الأمهات زيك كدة ..
** منة عامر : الحرية بالنسبالك ومن وجهة نظرك عبارة عن ايه ؟
** اميرة رزق : كسر القيود اللى بنحطها بإيدينا جوانا ..
** منة عامر : يعني لو مثلا واحدة من اصحابك جت قالتك انا اشتريت عربية جديده سقفها مكشوف تعالي ننزل نجربها .. هتقفي والعربيه ماشيه وتبقي عايزة تطيري مع الهوى اللي بيطير مع العربيه ؟
** أميرة رزق : للأسف لأ .......لسة مش قادرة اكسر القيود اللى جوايا و تكاد تكون بتخنقنى لكن لازال عندى أمل اكسرها ..
** منة عامر : طيب بما اننا جبنا سيرة الصحاب والاصدقاء احكلنا أميرة بتبقى عامله ازاي بعيدا عن الكتابة وبعيدا عن البيت والمسؤوليه ؟
** أميرة رزق : مفيش أى نشاط بتابعة للأسف بخلاف القرآءة و الرسم .
** منة عامر : لو اتعرض عليكي ان واحدة من اشعارك تتحول لأغنية راب يغنيها مثلا كاريوكي او زاب ثروت ؟ .. هتشجعي الفكرة وتتقبليها ولا هترفضيها ؟
** اميرة رزق : طبعا موافقة جدا انا بسمع كل الأندرجراوند و بعشق مسار اجبارى و كايروكى..
** منة عامر : تمام ودي حاجه جميلة منك لان في كتاب كتير بينتقدو او مش بيوافقو انهم يحولو كتابتهم لاغاني توصل للناس ..
** اميرة رزق : تسلمى يارب لكن انا فعلا بتابع الفرق الجديدة و بسمعلها والا مش هتغير على الاقل بتغير في اللى بقدر عليه ..
** منة عامر : إجاباتك كلها جميله ..
** أميرة رزق : انتى الاجمل يا قمر انا مبفكرش فى الاجابات على فكرة كلها تلقائية ..
** منة عامر : وده الاحلى والاحلى على فكرة خليكي على حريتك خالص وقولي كل اللي جواكي ..
** منة عامر : تمام .. في بدايتك للكتابه اتعرضتي لمواقف فكرتي بسببها أنك توقفي كتابة ومتكمليش ؟
** أميرة رزق : فعلا حصل كتير نقد لكتاباتى و نصايح لكن حاولت اتعلم منها على قد ما اقدر و لازلت بتعلم ..
** منة عامر : بس مفكرتيش انك توقفي استمريتي ؟
** أميرة رزق : لا تماما لأنى أحيانا بكتب رغم إرادتى ..
** منة عامر : ايه اللي شاغل قلب وعقل اميرة رزق في الوقت الحالي ؟
** اميرة رزق : كتاباتي وأحلامي ..
** منة عامر : مع كل صباح جديد بيمثلك الأمل والتفائل حتى ولو كنتي في اصعب امورك ولا الحياة الصعبه بتفرض صعوبتها عليكي وبتحسي ان مع كل صباح جديد هايبقى اصعب من اللي قبله ؟
** أميرة رزق : كل صباح بيعدى بيكون مختلف عن اللى قبله لكن بيشمل الاتنين بالتأكيد..
** منة عامر : وضحيلي اكتر ؟
** أميرة رزق : يعنى فى صباح بحس انى هاملك فيه الدنيا كلها و فيه صباح بيكون نهاية الدنيا بالنسبة ليا...
** منة عامر : رجعتي عن قرار اتخذتيه في حياتك وكان المفروض انه قرار مصيري ؟
** أميرة رزق : آه كتير عشان اعتبارات كتير اقوى من القرار نفسه ..
** منة عامر : العشق والغرام في حياة اميرة رزق ..ولو مش عايزة تتكلمي عن حياتك ممكن بس تقوللنا من وجهة نظرك شكله ايه ؟
** اميرة رزق : من وجهة نظرى كتبته فعلا فى نص بعنوان فى شرع العشق
فى شرع العشق
كل شئ وارد
كل خوف مطروح
كل نبضه ترج جوف القلب
و تِسْرى زى الضى جوا الروح
كل قرب يعّلقك فى الحب
وكل بُعد يِهْد فيك الروح
كل شئ مسموح
الا الغياب
دة عذاب
يِعَدى كل عذاب
بتروح معاه بوضوح
واللى بيفضلك
خيال ممسوح بيشبهلك
تايه ورا الأسباب
فى شرع العشق
كل الدموع أحباب
كل الكلام بيبوح
كل اللى قلبه إتساب
صَرْخة بُكاه بتنوح
كل النايات العذبة بتقولك
مهما تكون عاشق
والا تكون مجنون
والا تكون القصة أسطورة
مرسومة برا الكون
هيّ النهاية المعروفة هتدلك
و تثبتلك
إن الأمان خوان
والهجر شئ مضمون
** منة عامر : الله عليكي جممميييله جددا بحييكي على كلماتك الجميله أميرة للحروف فعلا ..
** أميرة رزق : حببتي ربنا يسعد ايامك كلها يارب ..
** منة عامر : بتحبي بلاك تيما عشان اغانيهم تشبه لاشعارك ؟
** أميرة رزق : جدا بعشقهم اصلا
** منة عامر : تمام ان شاء الله نحاول اننا نتواصل معاهم ونعرفهم بيكي وتتعاونو مع بعض في اغنية من كلماتك ..
** اميرة رزق : اتمنى تبقوا حققتوا حلم من احلامى بجد
** منة عامر: ان شاء الله باذن الله هنحاول فعلا وباذن الله هتحققي كل احلامك..
** أميرة رزق : ربنا يخليكى يا جميلة تسلميلى..
** منة عامر : اخر سؤال ليا معاكي وهنختم اللقاء الجميل ده ..
** اميرة رزق : أتفضلي ..
** منة عامر : كتاباتك بتتاثر بحياتك ؟ ومين اللي ساب أثر في اميرة رزق من الناس اللي قريتلهم ؟
** اميرة رزق : بتتآثر كتير بحياتى و اللى سابوا آثر بكتاباتهم كتير ...نبيل عبد الحميد .. اشرف الشافعى.. مصطفى ابراهيم .. أحمد اسامة .. دعاء عبد الوهاب .. محمد السيد .. احمد النجار .. مايكل عادل .. احمد الراوى .. كلهم سابوا آثر..
** منة عامر : الله عليكي ثقافتك جميله وانتي جميله ورقيقه وبنوجهلك تحية كبيرة من أسرة مجلة أدباء 2000 على أنك سمحلتنا باللقاء الممتع ده .. بنشكرك جددا وبنتمنالك تحقيق احلامك ويارب نعرف نتوفق ان شاء الله ونوصل لبلاك تيما وتعملو ديتو سوى .. وباذن الله هايبقى لينا لقاء تاني مع حضرتك بعد نشر ديوانك وبنتمنالك الخير والسعادة دايما في حياتك..
** أميرة رزق : تسلميلى يارب انتى اسئلتك هايلة و راقية و مختلفة ..
** منة عامر : ربنا يخليكي ده من زوئك .. يارب اكون كنت على المستوى المطلوب في لقائي مع حضرتك .. وبشكرك جدا على وقتك الغالي ..
** أميرة رزق : العفو انا اللى اشكرك انك سمحتى ليا اقول كتير جوايا ..
** منة عامر : واحنا دايما بنحب ان أدبائنا يطلعو كل اللي جواهم معانا في لقائتنا اتشرفنا بيكي في لقاء مع أديب 2000 وعلامة في سيرتي الذاتيه أني التقي بحضرتك نورتينا ..
** أميرة رزق : نورك ياجميلة ..
** منة عامر : أنتهى اللقاء الراقي مع اميرة الحروف الراقيه أميرة رزق بنتمنى ان اللقاء يعجب الناس كلها وشكرا لمتابعتكم لنا والى اللقاء ........
