الجزء الثاني من لقاء الدكتورة سالي مجدي
ي
** منة عامر : طيب لو اتعرض عليكي ان رواية ليكي تتحول لفيلم بمستوى عالي .. وسبولك الاختيار للروايه هتختاري ايه ؟
** د. سالي : كوكب آمون .. لو اتعمل فيلم محترم بجرافيك محترم هيطلع بفكره مصريه ..
جديده ولون مش عندنا في السينما المصريه .. البوليسي والرعب والرومانسي موجود بس الخيالي الواقعي ده وسينما الفضاء مش موجوده ..
** منة عامر : كل انسان في في حياته جزء محدش يعرف عنه حاجه غيره هو وبس .. في ناس ممكن يكون الجزء الغامض ده بيتمثل في عائلتها او في شغلها او في صداقتها او حتى في كتابتها لو أديب .. سالي مجدي الجزء الغامض في حياتها بيتمثل في ايه ؟
** د.سالي : مانا لو قلته مايبقاش غامض ..
** منة عامر : ههههههههه .. لا مش عايزاكي تحكيلي عنه بالتفصيل .. انا عايزاكي تقوليلي بس بيتمثل في ايه زي الامثله اللي ادتهالك كدة ..
** د.سالي : بصي انا فعلا بسيطه مش غامضه يعني بس بحاول اكون كده .. مابحبش اتدخل في حياة الناس ولا خد يتدخل في حياتي لان السعاده والنجاح نسبي ممكن النجاح عندي فشل لغيري والي يسعدني يضايق غيري وهكذا ..
** منة عامر : تمام .. بس انا من كلامي معاكي مش بس اجتماعيا هو الجزء الغامض في حياتك .. انا رأئي أنك افكارك لوحدها غامضه .. انا واحدة من معجبينك لو كنتي زي اي كاتب او روائي عادي كنت ممكن اتوقع مثلا وانا بقرالك رواية الفصل اللي جاي هايبقى في ايه او حتى الروايه الجايه ايه انما انتي .. بصراحه مش عارفه ايه الافكار الجديده اللي ممكن نقراها في روايتك الجديده مثلا ؟
** د. سالي : ههههههه اه فعلا بحاول اخلف توقعاتي حتي الشخصيه وانا بكتب .. اناعملت تجربة الكتابه اون لاين .. اكتب فصل بس وانشره وانا مش كاتبه الي بعده .. بكتب والقارئ بيقرا معايا اثناء الكتابه .. بدون تحضير للأحداث
** منة عامر : ده مش كتير الكتاب بيعملوه تقريباً مش موجودة الفكرة كتير ..
** د.سالي : التجربه دي عملتها في رواية ( اللعنه .. والقرين .. ونور وتجارة السنين واغني الرجال ) .. كنت بقرا كومنتات القراء ولو حد اصاب الاحداث القادمه بغيرها ..
بس بتحسي القارئ واقف معاكي في المطبخ .. مافيش مجال رجوع لتحديث الاحداث انا متدبسه والي حصل حصل .. بس كتير بغير مسار الخط الي في دماغي لمجرد كومنت واحد اصاب الخط الي هكتبه .. وراوية القرين كانت اكبر مثال ..
( القراء قفلولي كل الخيوط الا خيط واحد ماجاش في بالهم .. ان البطل الشرير ده هو نفسه الي بيستدرج الشيطان او القرين اللي اتفق معاه .. في الفصل الاول بيعقد اتفاق مع شيطان بهيئه أدميه ووقعوا علي مخطوطه تعويذه بالدم بالسمع والطاعه ..وطول الاحداث الشيطان يدبر والشاب بينفذ .. القراء كانو اصعب من الاحداث وعطلو كتابتي للنهايه حوالي شهر .. لانهم بيقفلولي كل الطرق بتوقعاتهم .. الا ان الشاب يطلع بيستدرج للشيطان بعد كل الي عمله علشان يثبتله انه اقوي .. المفروض انه سرق وزنا وغش وخدع .. وقتل في الاخر .. لانه مسير بسحر من التعويذه .. لكنه في الفصل الاخير بنكتشف انه في خظه التنفيذ لما بينفرد بنفسه ماعملش اي حاجه رغم استحواذ الشيطان السحري ليه .. )
** منة عامر : دايما بحس ان الكلام اللي بيتقال ان مهما عملت وسخرت ليك الف شيطان وجان .. هما هايحسيسوك انك انت المسيطر عليهم بس في الحقيقه ان السيطره بتبقى معاهم هما ولو الساحر عمل ايه مش هايعرف يسيطر على الجان او الشيطان اللي سخرهم ليه .. بما انك أديبه وكتبتي في الرعب والسحر واكيد قريتي كتب عنها .. رأيك ايه في ان الانسان ولا الجان هما المسيطرين انهي فيهم اللي بيسيطر على التاني ؟
** د.سالي : مستحيل اي جان او شيطان يأذي اي انسان .. بصي ربنا قال عن السحر والشياطين وماهم بضارين به احد الا باذنه .. ( وَاتَّبَعُوا مَا تَتْلُوا الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ومَا هُم بِضَارِّينَ بِهِ مِنْ أَحَدٍ إِلاَّ بِإِذْنِ اللهِ وَيَتَعَلَّمُونَ مَا يَضُرُّهُمْ وَلاَ يَنفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الآخِرَةِ مِنْ خَلاَقٍ وَلَبِئْسَ مَا شَرَوْا بِهِ أَنفُسَهُمْ لَوْ كَانُوا يَعْلَمُونَ} .
والآيه دي هي الي بنيت عليها تغير مسار القصه .. هو عارف انه مسير من الشيطان بعقد موثق بدمه .. بس ربنا قال انهم مايقدروش يضرو حد فهو في لحظة التنفيذ عرف انه هو الشيطان ..
الانسان في ايده انه يوقف الشر ..
** منة عامر : يعني رائيك انه الانسان هو الاقوى من الجان ؟
** د.سالي : الشيطان هو المحفز .. اما المنفذ هو الانسان ..
** منة عامر : تمام وزي المقوله المعروفه ان شياطين الأنس اقوى من شياطين الجان .. بس انا بحيكي على ذكائك .. انك تخلي الناس تحتار في نهاية القصه ..
** د.. سالي : في طب الاسنان لو مريض خرج من عندي مركب تركيبه قابل شخص قاله ماشاء الله تركيبتك جميله مين الدكتور الي عاملهالك دي شهاده موثقه
وانا بطبق ده عالكتابه ..
** منة عامر : تعالى نبعد شويه عن جو الرعب والسحر والشياطين وهسألك .. احكلنا بتعملي ايه لما بتلاقي وقت فراغ .. بتعملي ايه لما بتكوني مع المرضى بتهزري معاهم كدة بقى ولا بتتنرفزي لما تلاقي مريض مهمل في اسنانه ؟
** د. سالي : لا خالص بالعكس . . المريض المتالم من اسنانه وشكلهم وحش عايز امل .. انه هيبتسم .. ومش هيحس بألم .. وضحكته هتنور مهما كانت الظروف .. ماينفعش احبطه واعقده .. كله بيتعالج وكله بسيط بس المريض يحب نفسه ويستني ضحتكه وتمتعه بعدم الالم .. كلهم بيطلعو مبتسمين وبيضحكو من قلبهم .. حاليا انا ماجيستير عندي عيادتين خاصتين ومستشفيتين خاصتين ..
** منة عامر : هسالك على سؤال بعيدا عن الكتابه وشغلك .. !؟ ..لو مش عايزة تردي مافيش مانع .. عندك مسدس في بيتك ؟
** د.سالي : لا معنديش مسدس ومعتقدش ان حياتي فيها اللي يخليني اجيب مسدس ..
** منة عامر : طيب لو افترضنا انك اتسرقتي .. وحسيتي انك خايفه وقررتي انك متخافيش ولا تخلي ابنك يخاف .. هتفكري في ايه وهعملتي ايه عشان تخلي نفسك دايما وابنك حاسين بلامان ؟
** د.سالي : انا بنيت نفسي بنفسي .. وعملت كيان ليا ناجح .. انا زي مافقدت حاجات كتير كسبت نفسي .. الي عند ربنا مش بيضيع وربنا قريب وعادل ..
** منة عامر : طبعا ربنا هو العادل وهو احن على الانسان من كل حد في حياته ..
** منة عامر : شايفه نفسك ايه في المستقبل اللي انتي حطاله اهدافه من دلوقت ؟
** د.سالي : هحول كل الروايات من النشر الالكتروني للورقي قديم وجديد علي التوازي
نفسي احول منهم حاجات لافلام . . في طب الاسنان اخلص الماجيستير واخد دكتوراه وافتح فرع ثالث لعيادتي .. وحلم تالت كده ربنا عارفه بقي ..
** منة عامر : عموما انا بحترم خصوصياتك ودي حاجه كل الناس لازم تحترمها ..
** منة عامر : ااخر سؤال مني ليكي وهننهي اللقاء الممتع ده وان شاء الله هايبقى في واحد تاني باذن الله ..
.. بتحبي تقري لمين من الشباب الجداد في الادب ومن القديم .. ؟
** د.سالي : روايات كتيره جديده جميله وانا بحب .. اولا دكتور مصطفي محمود انيس منصور يوسف السباعي احمد خالد توفيق .. في احمد ابراهيم وهاجر صلاح الدين ودكتوره براءة بعشقها .. ومرنآ محمد بحب كلماتها وكتابها حلو اوي ..
مع تحفظ علي انفتاح في النشر خلي كتب كتير بتناقش افكار غريبه بدون اي رقابه .. يمكن الي مشجعني مع دار روعه انهم بيرفضو الاعمال الشاذه والمنافيه للاخلاق او الي بتشع افكار سلبيه ودي حاجه احترمتها ..
**منة عامر : في نهاية اللقاء الممتع معاكي وشرفتيني ونورتيني وسعيده جددددااا جدددا .. باللقاء ده لانك من الشخصيات النادرة ف مجتمعنا اللي اصبح اكثرو منافيق وقليل جدا لما بتلاقي انسانه زيك قدوة محترمه وكاتبه كبيرة بافكار مختلفه وجميله ..وصبورة ومستمره في حياتها مهما كانت الظروف وبتقوى اكتر مع وجود اي شرخ في حياتها .. بتمنالك تحققي كل احلامك ويارب تحققي اهدافك لمستقبلك والتوفيق دايما ليكي .. ومنتظرين منك كل فكر جديد في عالم الخيال والرعب ..
** د.سالي : متشكره ليكي .. انا اسعد ربنا يوفقك يارب ..
****************★★★★ نهاية اللقاء
