لقاء مع أديب 2000 مع ميرنآ محمد

اللقاء المرتقب الثالث لفقرة ( لقاء مع أديب 2000) ( مرنآ محمد ) 

** منة عامر : في البدايه والنهاردة غير اي بدايه بدايتنا هتكون جميله ورقيقه وضحكتها حلوة وابتسمتها نادره .. وكلماتها ارق واروع من الاحلام .. هتكون معانا في لقاء مع اديب 2000 اميرة من اميرات الحروف المميزين جدا باسلوب كتابتها واشعارها ويوميتها الجميله الحالمه .. معانا ومعاكو النهاردة .. الاستاذه مرنا محمد .. صاحبة بعض من ضمير الأنا .. اهلا بيكي معانا وبرحب بيكي وسط أدباء 2000

** مرنآ محمد : اهلاً بكِ يا جميلة ، 

شكرا علي المقدّمة الرائعة دي :) 

** منة عامر : العفو دي اقل حاجه ليكي ياقمر .. انا واحدة من المعجبين بكتاباتك الجميله .. 

** مرنآ محمد : تسلمي يارب :)

** منة عامر : .. هسيبك تعرفي نفسك للناس عايزاكي تقولي وتتكلمي عن البنت اللي جواكي .. عايزاكي تعرفي الناس مرنا محمد ازاي بدات تمسك قلمها وتبدأت في كتابة احلامها وافكارها على الورقه اول مره في حياتك .. وعن احساسك وشعورك وقتها كان ازاي وايه اللي حببك وخلاكي تكتبي ؟ 

** مرنآ محمد : غالباً البداية في أي حاجة مش بتكون مقصودة ..او بمعني آخر ساعات بيبقي جواكي موهبة بس انتي مش حاسة بيها او مش شايفاها ..محتاجة لإشارة او لحدث في حياتك عشان تطلع و تبدأ تظهر فيكي ..

دي بالظبط بدايتي مع الكتابة .. كنت في 2 ثانوي ..كنت بدرس العروض و حبيت الشعر و الإلقاء جداا .. كنت بحب اقرأ لنزار قباني و ابي القاسم الشابي و بدر شاكر السيّاب  و إيليا ابو ماضي ..المهم بدأت احس ان في حاجة جوايا بتقولي اكتبي .. فبقيت بخلي جنبي قبل ما انام ورقة و قلم ..واي حاجة تخطر علي بالي اكتبها ..كنت بكتب جمل صغيرة بالانجلش و بعد كده بدأت اكتب خواطر بالفصحي .. بس  لما دخلت الجامعة اصحابي شجعوني اني اعمل صفحة علي الفيس بوك .. عشان اقدر امارس الكتابة يومياً بلا انقطاع

** منة عامر : تمام وده شجعك طبعا على الكتابه نزار وإليليا ابو ماضي محدش يقاومهم .. 

** مرنآ محمد : اكيد .. أنشأت الصفحة في 2011 و بدأت اكتب فيها و احسّن من اسلوبي في الكتابة .. و مع الممارسة بقيت بحس اسلوبي بيتطور بسرعة .. و بقت الكتابة بالنسبة لي ادمان .. .. جزء مهم في حياتي .. 

** منة عامر : احكلنا عن اول كتاب ليكي .. ؟؟ بعضُ من الأنا ؟ 

** مرنآ محمد : ممم ..بعضٌ من الأنا هو مولودي الأول .. 

مبدأياً  الكتاب ده كان من الممكن ان لن يكون له  وجود اذا لم يكونو اصدقائي واقفين جنبي و بيشجعوني .. 

من وقت ابتدائي في الصفحة الرسميه  و بدأت الناس تقرألي و تعجب بحروفي .. لقيت متابعين كتير بيقولولي نفسنا نقرأ لك كتاب…الحمد لله متابعيني من مصر و فلسطين و الاردن و الجزائر ..و كان اصدقائي دائما في كل اجازة صيفية يشجعوني ويسئلوني عن الكتاب واننا مستنين منك الكتاب يا مرنا ؟فكانت دي حاجة بتحمسني جدا ..بس كنت كل ما ابدأ في كتاب مكملهوش و اسيبه ..

لغاية ما بدأت في بعض من الأنا 

وهو عبارة عن كتاب من 6 فصول مختلفة ..بيناقش الذات او الأنا الخاصة بأي شخص يقرأه

و حاولت اتناول فيه مواضيع مختلفة عن الحب و السعادة و الحزن و كلمات عن التغيير و الامل و مواقف من الحياة و عبارات فلسفية عميقة .. عشت فيه اكثر من حالة و اكثر من تجربة .. و اسماء الفصول :

1 - رسائل من مجهولة 

2 قهوة

3 احاديث متقطعة

4 خواطر

5 مقتطفات بالعامية

6 بعض من الأنا 

** منة عامر : ايه اكتر فصل بتحبيه في كتابك ؟

** مرنآ محمد : سؤال صعب الحقيقه .. ولكن ..

الخاطرة دي أظنها من أكثر كتاباتي اللي عجبت الناس :)

سأبدأ روايتي معك بـاللاشئ 

و انهيها بكل شئ اصبح لاشئ 

سأعاقبك بغيابي بينما أمارس الكتابة سراً ،

 سأدفن تفاصيلك هنا علي الورق

فلاشئ منك يستحق دموعي و لا شئ مني قد تبقي مني

و كل الأشيآء ملكك ..لم تعد ملكي.. لم تكن ملكي ..

لن تكن ملكي..

سأتركك تتذكرني ، تتعذب بي في وجودها و غيابي ،

 تتحسر علي كل كلمة قصدت بها هدم كبريائي و بكائي.. 

انا التي لم تعرف يوما الشر لن تبالي ، 

سأمتلأ بـأكسجين أشجار العالم ، سأحترق ، 

و اشتعل فيكَ بـكل نيران الحرآئق ، بحمم البراكين ،

 و الغازات المسيلة لدمائك ..

فـ كن مُستعداً يآ أنت لتموت إحدي ميتاتك ،

 لتموت بحثاً عن آثاري ،

 لتموت و انت مقتنع بأن عواصفي لن تهدأ ،

 لن تترك جسدك يستقرُّ بترابي..

باسم الحب و الفراق 

باسم الانتقام و الغفران

أعلنتُ عليك حرباً لن تنتهي بغيابي

فأنا فوضت شوكَ قلبي قاضياً لـأشواقي ..

تعالي إليَّ اذا ، لتلسعُكَ لدغاتي ، 

تعالي و لا تخشي ان تذق قساواتي...

تعالي و دق بابي من جديد لتيقظ آهاتي..

 تعالي و اعتني بي لأقذفك برصاص إهمالي..

اتذكَّر حين كنا نلتقي بالمقهي المجاور لبيت صديقك.. 

كم كنت تهملني ، تتأخر عني لساعات ،

تدعني احتسي قهوتي وحدي باردة ..

 كنت تفضل أن انتظرك علي تلك الطاولة المواجهة للشارع ، تطلب من النادل أن يفرغها لي خصيصاً كلما ارتدت المكان ..، و گأنك تريدني ان أصير (فُرجة) للناس، 

تهوي رؤيتي أمِلُّ .. اتبعثر...، 

كنت انتظر ، ألقي نظراتاً خاطفة علي ساعة يدي

 ثم اخبط بأظافري سطح الطاولة ، 

أمسح علي شعري الذي صففته لأجلك بعناية بـكثير من الضيق ، اخرّب تسريحتي.. أعيد الغرة للورآء 

و اخرب ما سدل منه علي ظهري... 

ثم أعود لأتأمل هاتفي..علّك تتصل ،

 أو تبعث لي بإعتذار في رسالة طائرة.. 

كنتُ غبية لـا أفكر بالرحيل ..،

اقنع نفسي بأنك ستأتي و ان كل الوقت الذي ابتلعه 

صبري و انتظاري كان مجرد دقائق لا تُعد ..!

لم اعترف يوما بأنها مجرد دقائِق

لـا أهمية لها في حياتِكَ !

** منة عامر : كلمتها كلها عن الرحيل عن انسان ادتيله كل حاجه .. ايه الاحساس اللي خلاكي تكتبي الخاطره ده .. في موقف معين حصلك او قصة حصلتلك خلتك تحسيها وتكتبيها ؟

** مرنآ محمد : هو في الحقيقة دي رسالة رقم 6 ..في أول فصل في كتابي بعضٌ من الأنا .. و الفصل ده بيتكون من 8 رسائل و الرسائل دي بتحكي عن شعور شخصية بتكتب لشخص آخر مجهول ..يعني مش موقف شخصي .. هو من وحي الخيال تماما

** منة عامر : خيالك جميل جدا بحيكي عليه .. 

** مرنآ محمد : أشكرك يا جميلة :)..

** منة عامر : طيب ده برضو هايخليني اسالك الجزء الغامض في حياتك اللي محدش يعرف عنه حاجه بيتمثل في انهي جزء من حياتك .. هل علاقاتك برا عائلتك ولا جوا عائلتك ولا علاقاتك مع اصحابك .. عايزاكي تقوليلي الغموض اللي حسيت بيه معاكي في اللقاء بتعنا ده .. ده انطباع كل الناس عنك ولا انا بس اللي حسيت بالغموض ده ؟

** مرنآ محمد : ممم...(الغموض يا صديقتي رفيق مُخلص جدا ، يقتحم غرف ذاكرتي وحده ..دون تدخُّل مني ! 

و كأن دماغي  أصبحت مبرمجة عليه ! )

و لكن في لقائنا ذاك لا أظنني كنتُ غامضة .. علي العكس إجاباتي واضحة تماما :)

** منة عامر : احساسي بيكي ان الغموض اللي في حياتك مش غموض وبس ده حاجات كتير !! 

** مرنآ محمد : زي ؟ 

** منة عامر : زي حياتك اللي محدش يعرف عنها حاجه ؟! 

** مرنآ محمد : طيب عايزة تعرفي ايه عن حياتي ؟

** منة عامر :  عرفيني اللي انتي مخبياه .. جواكي وحاسه انك لو طلعتيه وحكتيه هترتاحي ؟ 

** مرنآ محمد : ممم ..الكاتب هو الشخص الوحيد اللي مبيعرفش يخبي حاجة صدقيني .. و دي أكثر حاجة بتضايقه .. كلماته بتكون زي مراية ليه قدام الناس .. 

** منة عامر : ولو قلنا ان مرايتك هي كلماتك اللي بتعرضيها على الناس .. ليه كتير من كلماتك على حسابك الشخصي عن الأنا ؟  

** مرنآ محمد : أكيد مش كل حاجة بكتبها (بتعبر عن شعوري شخصيا ) .. و لما بكتب بضمير الأنا ..فلأن ده اسهل ضمير ممكن تعبري بيه في الكتابة خصوصا أنه بيوصل للناس بصورة أسرع ..

(عن البنت اللي بتحب نفسها أكثر من أي حد !!) مش معاكي في الكلمة دي أبداً .. البنت اللي دايما أحب أمثلها في كتاباتي هي البنت القويّة اللي كل ما بتكبر كبريائها بيكبر معاها .. هي مش بتدوس علي قلبها و لا حاجة هي بتحاول تحافظ علي قلبها و تحميه من أي سوء سواء ان كانت بتحميه من حزن أو حب عابر أو من أي محاولة من الواقع لتشويهه ..

فالبنت غالبا في مجتمعنا الشرقي مالهاش دهر (سوي أحلامها) فإذا افلتتها هتعيش كـ شخص ضائع ، تتحكم فيها الأيام و تأخذها الي هنا و هناك من غير ما يبقي ليها صوت أو حق الاعتراض علي شئ ..

نفسي أوعّي المرأة العربية تجاه نفسها و تجاه اهميتها .. نفسي  كل بنت تعرف انها جميلة فعلا و وجودها مهم في الحياة مهما حاول اي حد انه يحبطها او يضعها في قائمة الفاشلين و المهمشين.. ) 

** منة عامر : والراجل في حياة البنت .. ؟ دايما وعلى طول عارفين ان الراجل هو السند للبنت في مجتمعنا الشرقي .. كل بنت اكيد عارفه انها جميله بس في بنات بتحس ان وجود راجل في حياتها هتكون احلى واحلى .. معايا في الكلام ولا ايه ورائيك ايه ؟

** مرنآ محمد : طبعا الرجل في حياة البنت هو السند ..بس يعني ايه رجل في حياة البنت ..(حبيب سري مثلاً) !!

يتبادلوا الحب و اللقاءات سرا ؟ و بعدها بكام يوم يقولها باي !

و تكره هي الحب و تقولك مافيش حاجة اسمها حب او يحصل العكس و هي تسيبه و يفترقوا و هو يقول ما فيش حاجة اسمها حب بعد ما يكون كل واحد فيهم استهلك مشاعره و بقي قلبه مش ملكه ..و فقد اجمل مشاعر ممكن لو كان استغلها في حب حقيقي قدام ربنا و قدام الناس كان وقتها حس بقيمتها و بطعمها الحلو ..

من الجميل ان يكون هناك رجل في حياة البنت بس مش اي حد ممكن نقول عليه رجل و نصدقه و نمنحه اجمل احاسيسنا و مشاعرنا .. 

** منة عامر : حلو جدا وعجبني رائيك كاكاتبه وشاعره بس هو ده نفس رائي مرنا محمد وسط عتئلتها بمعني انتي ك مرنا .. الراجل بمعنى كلمة راجل في نظرك يبقى عامل ازاي ؟

** مرنآ محمد : الرجل في نظري هو اللي بيحترم المسافات و الحدود ..هو اللي بيحاول مايتعداش حدوده مع بنات الناس .. هو اللي بيلتزم بوعوده .. و مش بيحاول يأذي البنت اللي بيحبها و لو بكلمة ..هو اللي بيعمل المستحيل عشان يوصل للبنت اللي عايزها و يعرفها بحبه بس في الحلال ..الرجل افعال و ليس كلمات.  .. 

** منة عامر : بحيكي على رأئيك .. 

** مرنآ محمد : شكرا ليكِ .. 

** منة عامر : حاولتي تكتبي في اي اتجاه تاني للأدب ؟ والسياسيه في حياتك دورها ايه ؟ 

** مرنآ محمد : بكتب قصص قصيرة و خواطر و حاليا بكتب رواية بتناقش قضية اجتماعية .. بصراحة انا دور السياسة في حياتي بسيط جدااا .. لاني مش بتعمق فيها او اقرأ مواضيع سياسية الا نادرا .. 

** منة عامر : لو قولتلك تحكيلي على موقف او قصة حصللتك في حياتك غريبه وكل لما تحكيها لحد يقولك غريبه الحكايه دي ..يترى هلاقي في حياة مرنا محمد قصص غريبه ؟

** مرنآ محمد : احيانا بكتب حاجات سواء قصة او خاطرة عادية و تحصل ..سواء معايا او مع حد من اصحابي .. بس اعفيني من ذكر الموقف نفسه 

ودي كانت حاجة بتضايقني جدا و تخليني اتوقف اوقات كتير عن الكتابة خصوصا لو الحاجة دي فيها حزن او وجع 

** منة عامر : معنى كدة ان احساسك عالي بالناس اللي حواليكي ؟ 

 ** مرنآ محمد : الله اعلم .. ممكن تكون صدفه او فراسه .. 

** منة عامر : او حاسه سادسه ؟ 

** مرنآ محمد : ممكن :) :)

بالنسبة للصدف ..

هو طبعا مافيش انسان مبيغلطش ..مافيش حد بتبقي كل قراررته صحيحة ..

فممكن اكون اخدت قرارات كتير في حياتي غلط لكن اتعلمت منها كتير اووي .. 

** منة عامر : لو حد بعتلك على الصفحه الرسميه الخاصه  وقالك على مشكله خاصه بيه في الحب هتساعديه على حلها حتى لو كان راجل مش بنت ؟ 

** مرنآ محمد : هو عادةً الحاجات اللي زي دي بتجيلي علي ال ask. Fm و بفضّل اني استقبلها هناك مش علي رسائل الصفحة ..و بجاوب فيما اعرف فقط بحيث احاول انفع الشخص علي قد ما اقدر فيما يرضي الله .. 

** منة عامر : علاقتك بربنا .. فيها ذهاب واياب .. ولا بتروحي وترجعي تاني في العلاقه بينك وبين ربنا ؟ ولا انتي مستمره على العهد ؟

** مرنآ محمد : يعني ايه ذهاب و اياب ! يعني قصدك اني بعرف ربنا وقت المصلحه بس ادعي عشان يستجاب ليا وقت الحاجه فقط .. !! 

** منة عامر : لا ..قصدي ان مثلا في ناس بتعمل غلط وتتوب عنه وترجع تعملها تاني فا تحس انها خانت العهد بينها وبين ربنا .. انا بالنسبالي التوبه وعلاقه الانسان مع الله واستمراره فيها بشكل يرضي الله سبحانه ده في حكم العهد .. انتي بقى بالنسبالك ايه هل التوبه والقرب من ربنا بتاخديه بصفه عهد مع الله ولا علاقتك بربنا زي اي حد يستغفر ربنا ويقول يارب مش هعمل كدة تاني وفيه ناس بترجع لنفس الغلط وفيه ناس بتغلط غلط جديد ؟ 

** مرنآ محمد : هو فيه فرق بين واحد بيعمل حاجة غلط عن قصد .. و بين حد بيقع في الخطأ غصب عنه ..

و انا معظم اخطائي كانت غصب عني .. في حاجات بتستدرجني ساعات ليها و اكون شيفاها بنظرة عادية جدا .. بس بتجيلي اشارة من قلبي ان الحاجة دي غلط و مينغعش استمر فيها .. فببعد و استغفر ربنا .. و بحاول علي قد ما اقدر مكررش اخطائي .. و ده هو العهد مع ربنا و مع نفسي .. 

** منة عامر : ياريت كل الناس تبقى على العهد مع الله .. 

** منة عامر : كنت أظن اني احبك!! ؟ ممكن تكمليها ولو كملتيها كا خاطر ه كامله طويله هتكمليها على احساس من جواكي  ولا خيال والهام من عقلك فقط ؟

** مرنآ محمد : هكملها عن الهام من موسيقي لعبت بأذني وقت كتابتها :) 

** منة عامر : بتحبي تسمعي لمين ؟ 

**مرنآ محمد : Yanni…  yiruma ..bethoven ..cleaderman ..johan strauss .. عمر خيرت 

** منة عامر : طيب لو اتكلمنا عن الوقت اللي مرنآ محمد بتقعد فيه لوحدها .. يترى بتفكري في ايه وانت لوحدك ؟ 

** مرنآ محمد : ممم بفكّر في بكرة ..انا عايزاه يبقي ازاي .. 

** منة عامر : يعني بتحطي اهدافك وتخططي ؟

** مرنآ محمد :  طبعا .. و لكن علي المدي البعيد .. 

** منة عامر : ليه طابع الحزن غالب على اشعارك ؟ 

** مرنآ محمد : يمكن لان الحزن أقرب إلي قلبي .. كما انني اميل للموسيقي التراجيدية اثناء الكتابة ..قلمي يتأثر بهذا النوع اكثر

** منة عامر : وازاي بتدي الناس التفائل في حياتهم وانتي في قلبك الحزن غالب ؟

** مرنآ محمد : ممم مبقتش بسمح للحزن انه يبقي غالب ..في حاجات كتير اكبر من انك تستسلمي للحزن 

** منة عامر : وانا كنت منتظره منك الكلمه دي من اول اللقاء انك هايجي يوم ومتسنحيش للحزن انه يسيطر على قلبك الرقيق ..

** منة عامر : مين من الادباء الجداد بيشدك تقرائي له ؟ 

** مرنآ محمد : احلام مستغانمي  .. يوسف زيدان و محمود درويش و غادة السمان .. 

** منة عامر : بحيكي للمره الثانيه على اختيارتك للقراءه ..

** منة عامر :  نفسك تكوني ايه ف المستقبل اللي بتتمنيه لنفسك ؟

** مرنآ محمد : نفسي اكون انسانة ناجحة في حياتي مع الشخص اللي يستحقني و استحقه و اللي هيكون هو سبب نجاحاتي الجاية كلها .. 

و نفسي اكون شخصية تنفع و لا تضر ..تنصح و لا تبخل .. صريحة و لا تجامل .. و ان ربنا يرزقني بحب الناس و اعيش في سلام دائم .. 

** منة عامر : واحنا بنيابه عن كل الادباء والشعراء وكل الناس بنتمنالك تحقيق احلامك لمستقبلك اللي جاي ان شاء الله ومستنين منك كل جديد في الخواطر ومستنين كتاب تاني بيضم كل الفرح اللي هتشوفيه الفتره اللي جايه ان شاء الله   .. ووقتها بقى تسميه بعضٌ من فرحي أنا ان شاء الله .. شكرا ليكي وشكرا لوقتك اللي اخدته منك وشكرا لحضورك معايا في البقاء الممتع ده وبوعدك ان شاء الله ان في لقاء تاني عن قريب معاكي ده لو تحبي يعني اني استضيفك تاني معايا .. 

** مرنآ محمد : يارب بإذن الله :)

هههه لا هو المشروع الجاي ان شاء الله هيكون رواية مش كتاب :)

سعيدة جدا باللقاء الجميل ده .. و شكرا لكِ انتِ و لحديثك الممتع .. و اتمني ان ألتقِ بكِ علي خير دوما يا جميلة :) .. ده شئ يسعدني و يشرفني جداا :)

** منة عامر : تسلمي يا قمر والله انا فعلا استمتعت باللقاء ده بس سمحيني لو كان مش طويل اوي انا مش عايزة اطول علييكي اكتر من كدة وكمان انا لسه هدرسك اكتر .. 

** مرنآ محمد : ده شئ يسعدني و يشرفني جداا :)

انتهى لقائنا مع الرقيقه الجميله ( مرنآ محمد ) .. انتظرو اللقاءات القادمه معانا في أدباء 2000 .

★★★★★★★★★★