لقاء مع أديب - وائل الخطيب

بسم الله الرحمن الرحيم

أهلا بكل أدباء2000 .. لقاء مع أديب 2000 النهاردة .. انا شخصياً محتاره اوصفه ازاي او بأيه .. كلماته في كتابه الأول نسطيع أننا 

نقول أنه مختلف ومميز من أول كلمة بكتابه .. تميز ببساطة كلماته في الرومانسيه .. تميز في تعبيره عن الحريه .. تميز في نصائحه للدين والروح والنفس المطمئنه .. معانا النهاردة ومشرفنا في لقاء مع أديب 2000 ..  ( ( الجمجمه )) .. الاستاذ

   (( وائل الخطيب )) .. اهلا وسهلا بحضرتك ..

** وائل الخطيب : أهلا بيكم .. وسعيد إني هكون معاكم النهاردة واتمنى أكون ضيف خفيف يستفيد قبل ما يفيد ..

** منة عامر : طبعا حضرتك ضيف خفيف وكتابك كمان خفيف وسلس وان شاء الله نستطيع ان نستفيد من خبرتك

كـ أديب مبدع نتعلم منك أزاي نكتب وأزاي نخرج أفكارنا وأحلامنا ..

** منة عامر : اول سؤال هيبقى عن فكرة الكتاب (( مذكرات ميت )) .. حضرتك في حديثنا قبل اللقاء ذكرتلي ان الكتاب 90٪ منه حقيقي ؟ نحب نعرف منك الفكرة جت ازاي احكلنا شويه عن الحقيقه اللي في الكتاب واحنا هناخد الكتاب خطوة خطوة معاك وعندنا اسئله كتير ليك ؟

** منة عامر : الفكرة ما كنتش مرتبلها .. لكن في الواقع تشغلني فكرة الموت وما بعده .. طفت الفكرة بشكل جنوني عن واحد ميت بيكتب مذكراته .. حياته .. سقطاته .. فرحه .. الآمه ..  خبراته .  وكل ده بما لا يتعارض مع الدين بأي حال من الأحوال .. لأن فيه حدود انا شخصيا ما اقدرش اعديها .. عوضا عن ان الواقع مليان بقصص أفضل من الخيال وتتعداه أحياناً. . الكتاب بالفعل 90% منه واقعي صيغ بشكل أدبي والطبعة اللي نازلة في معرض الكتاب 2016 هيكون فيها قصص زيادة ..

** منة عامر : يعني حضرتك هتنزل جزء ثاني للكتاب ؟

** الخطيب : مش جزء تاني ... قصص كنت كاتبها وعشان الكتاب يلحق النشر ما نزلتش فيه .. وهتنزل في الطبعة الجديدة ان شاء الله..

** منة عامر : بنتمنالك التوفيق دايماً أن شاء الله ..

** الخطيب : ليا ولكل مبدع بينشر وعي مش سفه ان شاء الله ..

** منة عامر : أمتى حسيت بالأختناق ؟

** الخطيب : شعور الاختناق بييجي لما تحس ان كل البدائل المتاحة للحل ما بقتش نافعة .. الاختناق بيجي من وطن موجوع. . قلب مجروح .. فكر حيران .. الاختناق بيقتل كل فكرة جديدة وأمل جديد .. الاختناق يأس .. الاختناق حصار .. وعلى الرغم من ده كله لسه ما وصلتش اني ايأس .. لسه فيه أمل حتى لو كان بعيد ..

** منة عامر : طيب ده هيخليني اسألك من نفس النوعيه .. أمتى حسيت أن حريتك مكبوته .. امتى حسيت أنك مقيد بسلاسل ولو أنت لازلت عندك الاحساس بالتقيد وحبس الحرية .. ده سببه أيه ؟ هل هو بسبب مشاكل في حياتك ولا بسبب تقيد رأئيك في أمور بلدك ولا في الاتنين ؟

** الخطيب : لما احس ان الكلمة بتتمنع .. لما صاحب قلم ورأي يتهان عشان رايه مختلف .. المشكلة الآن ان ثقافة الاختلاف تحولت بقدرة قادر لخلاف .. لا احترام لراي الآخر وتلاسن وتراشق وتسفيه .. كل ده بيؤدي لفكر مشوش لا يستطيع بأي حال من الأحوال الحكم على الامور بشكل صحيح ..

حياتي زيها زي اي حد فيها مشاكل وفيها فرح وفيها حب وفيها لعب عيال .. وفيها تهريج كتير .. المهم اننا ننفس عن اللي جوانا بطريقة سليمة تضع كل امور الحياة في نصابها الصحيح ..

* * *

** منة عامر : بما أنك كتبت ((  مذكرات ميت )) .. لو حبينا نعرف عن الروح .. وائل الخطيب هايعرفهالنا باي وصف وبأي شكل في عقله وتفكيره عن (( روح الأنسان )) ؟

** الخطيب : روح الإنسان هي أصله ومنها تنبع كل افعاله وتصرفاته .. بوجودها تدب الحياة وبرحيلها يفنى الجسد وتبقى هي معذبة أو منعمة بقدر أفعال صاحبها ..

الروح وجود وخلود .. الروح تغادرنا كل يوم .. تترك أجسادنا وأنفاسنا المعدومة لتحلق في سماء الله الى أن يأذن سبحانه برجوعها .. الروح أصل كا شيء في الجسد إن تركته صار بالياً وان عادت دبت في اوصاله الحياة .. الروح هبة الله داخل كل انسان ..

الروح أداتك لتنعم او لتشقى .. الروح انت فانظر لنفخة الله في آدم عليه السلام .. بدونها أنت لا شيء .. الا يا أيها الانسان ما أتعسك !!

** منة عامر : جميييل .. انت رائع ..

** الخطيب : الله يكرمك ...

* * أسمحلي أخذك في رحلة قصيرة في كتابك ( ( مذكرات ميت ) ) ؟ .. مستعد ؟

* * الخطيب :  مستعد يلا بينا ...

** منة عامر  : اول حاجه عايزة أسالك فيها .. اخترت الاسم ازاي للكتاب .. وليه مخترتش مثلا ٱنك تسميه (( جمجمه )) ؟

** الخطيب : مذكرات ميت ...الاسم كان لازم يبقى فيه تناقض . تعودنا اننا نكتب مذكراتنا وتتنشر كمان .. فكيف لميت ان يكتب مذكراته ويقرأها أحد من الاساس .. عنوان جاذب وصادم وغريب في نفس الوقت .. اعتقد انه سبب من اسباب رواج الكتاب ..

** منة عامر : طبعاً الأسم رنان جدا وبحييك على أختياره ..

** منة عامر : في قطعه في الكتاب شدتني جداً وحبتها اوووي على المستوى الشخصي .. قطعه الحلم في ترقيق حرف الراء في كلمة ( الحر ) .. المكتوب في القطعه دي ان الرسول عليه الصلاة والسلام .. خبط على كتف المتحدث وقاله رقق الراء وأبتسم وذهب ؟ الحلم ده من الحقائق الموجودة في الكتاب .. ولو حقيقي ياريت تحكلنا عنه بتفاصيل اكتر ..؟

** الخطيب : الشيخ حامد .. أرق من عرفت قراءة للقرآن ..

صوته يملأ القلب ايمانا ويقرب من روحك الى الله  .. وأكثرهم دقة في التحفيظ .. كان رحمه الله لا تخلو كل حلقة للحفظ له من دعابة أو قصة يحكيها .. فيبقى أثرها ورحيقها في نفوسنا .. القصة دي كنت بكتبها وانا ببكي لقدره عندي رحمه الله .. كان دائماً ما يقول اقرأ واحفظ لتعلو ... كنا نحفظ وجاء دوري في القراءة في تلك الآية. .. حتى وصلت الى قوله تعالى (( لا تنفروا في الحر قل نار جهنم أشد حرا لو كانوا يفقهون )) قمت بتفخيم الراء دون الوقف وهي مكسورة فأمرني بإعادتها ففعلت .. فأوقفني وحكي لنا عن تلك القصة .. كان يحلم أنه يقرأ تلك الاية وأخطأ نفس خطئي .. فإذا بيد تضرب على كتفه وصاحبها يقول له .. أتقرأ هذا يا حامد .. رقق الراء عند الوصل وفخمها عند الوقف .. فالتفت اليه فإذا به بالنبي صلى الله عليه وسلم يصححها له ..

رحمك الله يا شيخ حامد وأثابك عني وعن كل من حفظ القرآن على يديك خير الجزاء

* * *

** منة عامر : الجانب السياسي في حياة وائل الخطيب  .. بدايته أيه  وياترى النهاية او الجانب ده وصل لحد فين .. ده سؤال لحضرتك لاننا من بعد ثورة 25 يناير كلنا بقى لينا جانب في حياتنا سياسي ؟

** الخطيب : ثورة 25 يناير جاءت غيرت خريطة نفوس المصريين .. أثرها باق مهما حاول المزيفون والمخرفون ان ينالوا منها .. ثمانية عشر يوماً غيروا تاريخاً بأكمله وكتب الثوار بدمائهم ملحمة لن ينساها العالم ..

بعد الثورة اشتعلت جذوة الخلاف بين ثوار ارادوها عيش وحرية وكرامة وبين مدعي ثورة وضعوا السم في العسل من عامة الشعب .. اعلاميين واصحاب رأي وقلم .. سقطوا ولن يرحمهم الثوار والتاريخ يوماً. .

الثورة الحقيقية هي 25 يناير وما عداها ما هي الا محاولة لفرض السيطرة .. عاد الفلول وعادت نفس الوجوه البغيضة ..

تحول المعارض او المخالف في الرأي الى عدو وضد مصالح الوطن ..

الثورة تشتعل والانهيار وشيك ..

** الخطيب : وضعوا السم في العسل لعامة الشعب ..

 ( أحنا اللي خربنا البلد .. )

** منة عامر : السُم هو اللي ذاقه الشعب ولم يتذوقوا اي نوع أخر من انواع العسل  . .

* * *

** منة عامر : طيب تعالى نخرج من جو السياسيه والاموات شويه ..

** الخطيب : تمام نخرج

** منة عامر : من قرأتي للكتاب الجميل لاقيتك انك كلامك رومانسي وبسيط وحلو اوي .. وائل الخطيب الرومانسيه في حياته عامله ازاي .. عباره عن ورود وهدايا وكلمات رومانسيه .. ولا بتتخذ أي شكل من الأشكال ؟

** الخطيب : ورود وشيكولاته وهدايا وكلام ..

** منة عامر : جميل حضرتك بتعمل زي الكتاب مقال عن الرومانسيه ..

** الخطيب : ده جزء من الرواية الجديدة ليكم .. ( صورة لجزء من الرواية الجديده )

** منة عامر : شرف لمجلة أدباء2000 اننا ننشر لحضرتك جزء ولو بسيط من الرواية الجديده لحضرتك .. شرف ليا لقائي مع كاتب رائع مثل حضرتك

** الخطيب : شرف ليا والله الكلام معاك .. واستفدت كتير ..

** منة عامر : ربنا يخليك انا اللي استفدت كتير جداً .. وسام في حياتي وفي مشواري

** الخطيب : والله انا اللي وسام ليا اني تشرفت بيكي وبأسئلتك ..

** منة عامر : تنصح الشباب المبتدأه في الكتابه ب أيه ؟

** الخطيب : الشباب المبتدأه في الكتابة لا تتعجل خطواتك .. اقرأ واقرأ واقرأ .. جدد من لغتك .. انشر علما وثقافة وادبا ووعياً .. لا تمش في طريق السفه فسالكوه وان علوا فسيهوون لا محالة ..

* * *

** منة عامر : . المستقبل بيعنيلك ايه ؟ بتفكر وتخطط واهداف بتحاول توصلها ؟

** الخطيب : المستقبل .. وطن حر .. احترام للرأي .. المستقبل أدب حقيقي مبدع ينشر الوعي .  ادب يظهر الواقع ويحل مشاكله ..

بحاول اعمل حاجة اولادي يفتخروا بيها لما يكبروا .. أدب يقرأوه وهما مطمئنين انه مش هيخدش حيائهم .. ادب يغير ويعبر للأفضل ويترك أثرا في نفس القاريء.. لو عملت ده .. تبقى اكبر جايزة ..

** منة عامر :  بتستقبل النقد بصدر رحب وبتحاول تغير أي شيئ تم انتقادك فيه.. ؟

** الخطيب : اي كاتب قبل ان يكون كاتبا كان قارئا نهما فلابد وان يتقبل نقد القاريء .. ان لم يفعل فلا يستحق لقب كاتب. . وان استتفه رأي القاريء في نقده فهو عاجز. . الكاتب يرقى بالقاريء وللقاريء حق عليه فهو من صنعه .  فلولاه ما وجد الكاتب ولا راى انتشارا لكتاباته وافكاره ..

** منة عامر : لو لاقيت آله للزمن ممكن تسافر بيها لأي زمن واي عصر .. هتختار أنك تسافر بيها لأي عصر وأي زمن يستهواه وائل الخطيب .. ؟

** الخطيب : الاندلس .. ايام ازدهار الادب والفنون والعلم ..

** منة عامر : وقت ما كانت أوروبا يلقبونها بعصر الظلام .. لولا دخول الأسلام اليهم لظلوا بعصر الظلام ..

** الخطيب :  بالظبط .. وقت ما كنا نحمل مشاعل النور للعالم فيركع لنا القاصي والداني ..

** منة عامر : وقت كانت  الدنيا بين أيدينا نحن المسلمين .. وقت كان المسلمين لهم الكلمة الاولى في كل البلاد .. وقت ما كان المسلمين بتصدر العلوم والعلم والقراءه والادب لكل العالم ..

** الخطيب  : قبل الهوان بأوان ..

** منة عامر : الاموات في حياتك بتحلم بيهم ؟

** الخطيب : بحلم بيهم وبيسلموا عليا وبيبعتوا رسايل للناس كمان ..

** منة عامر : لو حبيت تعلن رساله من راسائل الأموات  هتعلن عن اي رساله؟

** الخطيب : افتكروني وادعولي .. احمد ابراهيم

صديقي توفى يوم 23/12/2014

** منة عامر : الله يرحمه ويسكنه فسيح جناته ..

أنتهى لقائنا مع حضرتك وأحب أقولك ان أكبر جايزة لينا أننا أتشرفنا باللقائك النهاردة على كل المستويات وبكل الجوانب .. استفدنا منك كتير أستاذنا ويارب أكون كنت محاوره خفيفه على قلبك .. انا أستمتعت بالحديث معاك .. وأن شاء الله هايبقى لينا لقاء ثاني مع حضرتك .. ومنتظرين الرواية الجديده وكل جديد من اديب رائع زي  (( وائل الخطيب )) ..

** الخطيب : شكرا ليكم .. استفدت كتير واستمتعت اكتر اني وسطكم .. ومن نجاح لنجاح 😊😊

** منة عامر : ربنا يخليك يافندم وبنتمنالك مستقبل مشرق ان شاء الله ..

خلص لقائنا مع الأديب (( وائل الخطيب )) .. صاحب كتاب ( مذكرات ميت ) .. بنتمنى التوفيق لكل أدباء 2000 .. وأنتظروا اللقاءات القادمة في فقرة

 (( لقاء مع أديب 2000 ) )

وسلاماً على من أخذ قلمه ورسم حلمه بكلماته ...

تحياتي لكل الناس .. منة عامر