الكاتب والروائى محمد مسعد حوار خاص لمجلة أدباء 2000

لقاء مع أديب 2000 .. هو ده اسم الفقره المخصصه مع الادباء والشعراء الموهوبين .. هنروح معاهم وهنسافر جوا خيالهم واحلامهم وهنعمل رحله جوا عالم الجان .. ومنها نروح لعالم الرومانسيه والحنان .. ونسألهم إزاى أصبحوا مثقفين وعلى دراية بكل هذه المعرفه لكل انواع الثقافه والقراءه .. وهنعرف مصادر روايتهم .. واحاسيسهم اللى شعروا بها وقت كتابة الرواية او الاشعار والخواطر .. وهنعرف ازاي بدات رحتلهم في بداية كتباتهم .. انتظرونا ولقاءات مع أديب 2000 بداية الفقرة واول لقاء هايبقى مع الروائي أ/ محمد مسعد * اهلا وسهلا بحضرتك وبرحب بيك في مجلتنا ومدونتنا الإليكترونية أدباء 2000 .. في البدايه أحب اعرفك للناس اللي متعرفش محمد مسعد .. أ/ محمد مسعد من مواليد 5 ديسمبر 1984 محافظة كفر الشيخ ليسانس لغة عربيه شعبة تاريخ وحضارة جامعة الأزهر بدأ رحلته مع الكتابة من سن 12 سنه ودلوقتى له مجموعة قصصيه بعنوان بحر العشاق ورواية بعنوان على أبواب الجحيم .. ونبتدي باول سؤال لحضرتك ** منة عامر : إيه خلاك تكتب وانت في سن 12 سنه ومين شجعك على الكتابه ؟ ** محمد مسعد : أهلاً وسهلاً بحضرتك فى البداية حابب ارحب بيكم وبهنيكم على الفكرة الرائعة للمجله لأن فعلاً فيه شباب كتير محتاج إن قلمة وإبداعه يوصل للناس . كانت بدايتى مع الكتابة مجرد محاولات بسيطة بتشجيع من والدى بعد ما إكتشف إنى إتعلقت بقراءة القصص والروايات من صغرى خاصة إنى كنت قرأت أعمال لكتاب كبار زى الحرافيش لعمنا نجيب محفوظ وقرأت العبقريات وغيرها من الكتب اللى كانت فى مكتبة والدى الشخصية حبيت جداً الادب المترجم وكانت اول رواية اقراها هى إبنة البخيل "اوجينى جراندية " لبلزاك بدأت اكتب قصص قصيرة واعرضها على والدى وواحد من أصدقائه اللى وصلنى لمركز الشباب فى القرية وبدأت ادخل مسابقات للقصة القصيرة فزت فى كتير منها وكان اهمها المركز الأول على مستوى المحافظة فى مهرجان القراءة للجميع وقتها كنت شايف ان وجود القلم حاجة ضرورية فى حياتى لابد منها علشان ارصد الأحداث من وجهة نظري حتى ولو كان اسلوب الكتابة ضعيف ده كان هدفى اللى خلانى ابدأ الكتابة من سن 12سنه .. ** منة عامر : كتير فعلا من شباب 2000 كانت بداية كتابتهم بإنهم يمسكوا قلمهم ويعرفوا قيمة الكتابة والقراءه في سن صغير وبنحيك على تفوقك وانت في سن صغير ؟ ** محمد مسعد : اشكرك ** منة عامر : احكلنا عن إحساسك وشعورك وانت بتكتب لأول مره قصة قصيرة حسيت انها تصلح للنشر ؟ واحساسك وانت بتجتهد عشان تكتب وايه الافكار اللي كانت على بالك وقت كتابة اول قصه قصيرة ليك وتحت اسمك ؟ ** محمد مسعد : اول قصة ليا حسيت إن فيها نضوج كافى وتصلح إنها تكون قصة قصيرة بجد كانت بإسم "ملكة القلوب " كتبتها عن بنت فلسطينية بتتولد وسط الدم والنار من صغرها بتشيل هم القضيه الفلسطينية وبتنضم للمقاومة وبتاخد بالتار من كل اللى قتل أبوها وامها كانت أول قصة احس إنى إتعلقت بيها وبأبطالها كان شعور أكتر من رائع لطفل عنده ١٥سنه إنك تشوف فكرة بتتجسد قدام عنيك بقلمك ده شعور لايوصف .. ** منة عامر : وشعورك واحساسك فعلا بيتجسد دلوقت في فلسطين بالفعل البنات الفلسطينات حاليا بقوا هما اساس المقاومات في القدس ضد الاحتلال .. ** محمد مسعد : بالفعل هو ده اللى كنت أقصده إن الطفل اللى شال هم القضية من صغرة لابد هيجى يوم وهو اللى هيحقق الحلم اللى طال إنتظاره .. ** منة عامر : سؤالي ليك دلوقت عن حياتك بعد اول قصة قصيرة واول جايزة استلمتها وايه الكتب والروايات اللي قرتها بعد الجايزة وإزاى شجعتك على الاستمرار في الكتابه ؟؟ ** محمد مسعد : اول قصة فزت بيها كانت الجايزة بسيطة ورمزية بس كان ليها أثر كبير فى حياتى لأنى حسيت بإنى كنت مميز جدا مابين أصدقائى بسبب الكتابة بدأت أقرأ أى كتب مابين روايات وقصص توصل ليا لأنى كنت حابب انى أنمى اسلوبى فى الكتابة بدات أشترى قصص وروايات لكتاب كبار زى إبراهيم اصلان ونجيب محفوظ والروايات المترجمة خاصة لشكسبير .. ** منة عامر : اكيد طبعا لازم تكون مميز مع القراءة لكل الادباء الكبار دول حتى لو كنت قارىء فقط ليهم مش كاتب كمان .. ** محمد مسعد : لابد لأى كاتب حابب إنه يتعلم وينمى موهبته إنه يربى نفسه على كتابات جيل العباقرة ادبائنا الكبار .. ** منة عامر : ودي نصيحه من كاتب وروائي متميز زي حضرتك لكل شباب أدباء 2000 .. ** منة عامر : قبل ما ندخل في مناقشة رواية بحر العشاق ورواية على ابواب الجحيم عايزة اعرف منك ازاي بتوفق بين شغلك وكتباتك لرواياتك وقصصك .. ياريت تقولنا عشان كل الشباب اللي بيكتبوا وبيشتغلوا فى نفس الوقت ازاي يوفقوا بين شغلهم وهوايتهم ؟؟ ** محمد مسعد : طبيعة الحياة فى مصر بتفرض على الكتاب الشباب إنهم ميكونش عندهم وقت فراغ كبير خاصة لو كان بيشتغل فى القطاع الخاص أنا دايما بحاول اوفق وقتى واستغل أى وقت فراغ فيه حتى لو كان لدقايق دايما فى شغلى بيكون معايا مفكرة وقلم برصد بيه أى فكرة بتدور فى ذهني و بحاول إنى أخصص ساعتين من وقتى على الاقل للكتابة أما القراءة فبيكون معايا دايما كتاب سواء كان ورقى او bdf بقرأ فيه فى أى مكان وفى أى وقت .. ** منة عامر : فعلا الورقة والقلم اصدقاء دايما للشعراء والادباء واصدقاء دائمين على مدار السنين . وبحييك على استغلالك لوقتك حتى وانت بتعمل في كذا مجال .. ** محمد مسعد : أشكرك يا فندم .. ** منة عامر : لو معانا دلوقتى المجموعة القصصية بحر العشاق ايه اول حاجه هتكلمني فيها فى المجموعة دي وانا عرفت من حضرتك ان فيها بعض القصص ليها معزه خاصه عندك .. ياريت تقولنا وتحكلنا شويه عنها ؟؟ ** محمد مسعد : المجموعة القصصية بحر العشاق فيها أكتر من قصة ليها معزة ومكانه خاصة اولهم "سرقة وطن " لانها إتكتبت فى ميدان التحرير فى الوقت اللى مصر كلها فيه كانت على قلب واحد وكلمة واحده حاسس إن الصورة الرمزية اللى فيها بتبشر بحلم كل حر ونفسى إن النهاية تكون زى انا ما توقعتها . كمان فيه قصة تانية بعنوان "حب لايموت " دى من أكتر القصص اللى كتبتها وإتعلقت بيها لاسباب كتير كل قصة من المجموعة مش شرط انها تكون تجربة خاصة بيا بالعكس دى صور لمشاعر وأحاسيس واحداث ممكن تكون حصلت ليا او لاى حد تانىكل قصه و الاحداث اللى فيها مابين سطورها قضية بتتناقش ورسالة حبيت إنها توصل للناس .. * * منة عامر : يعني نقدر نقول ان فيها من حياتك العاطفيه ؟؟ ** محمد مسعد : بالتأكيد لابد إن يكون فيه جزء ولو بسيط من حياة الكاتب العاطفية والإجتماعية فى كتاباته الابطال و الشخصيات بتستمد أفكارها وتجاربها من روح الكاتب .. فى بعض الأحيان الكتابة عند بعض الكتاب بتكون مجرد إسقاط لجزء من روحه على الورق ** منة عامر : تمام وكمان كل كاتب وله تجاربه فعلا اللي بتستفزه للكتابه على الورق وده من الحالات السيكولوجيه اوقات بيبقى في حالات لمرضى نفسيين مبيعروفش يتكلمو بلسانهم ولا يعبرو بكلامهم انما بيقدرو انهم يعبرو بكتابتهم على ورقة .. ** محمد مسعد : كتابات المرضى النفسيين لاتتعدى إنها تكون مجموعة من الكلمات بصورة عشوائية ممكن تفيد معنى وممكن لا اما الكاتب هو حالة فى حد ذاته من وجهة نظرى الكاتب هو مجموعة من الشخصيات والأفكار بتعيش فى كيان واحد الكاتب دايما لابد يعيش الف حياه ويمر بمليون تجربة علشان يقدر بخلى الروح تسرى فى شخصياته ويصنع لها حياة كاملة وهى فى الاصل مجرد كلمات على الورق بكده معتقدش ان الكاتب مريض نفسى .. ** منة عامر : حضرتك انا اقصد من كلامي ان حتى المرضى النفسيين في كتير منهم حالات مبتقدرش تعبر عن اللي جواها الا لو كتبت على ورقة .. انما الكاتب فعلا بيخرج افكاره على الورق بقلمه وبيحول الخيال لواقع جوا رواية او كتاب عن الثقافه او السياسه او اي نوع من انواع الكتابه والتشبيه هنا بالمرض النفسي اللي من النوع دة اقصد بيه ان حتى المرضى النفسيين بيحتاجو اوقات لورقة وقلم عشان يعبرو عن وجعهم وافكارهم وتكاد تكون احلام كانت في عقولهم قبل ما يبقو مرضى .. ** محمد مسعد : تمام مظبوط ده اللى اقصده .. ** منة عامر : واحب اقولك اننا كلنا لو دورنا جوانا هنلاقي اننا كلنا مرضى نفسيين بالنسبه لدكاترة الطب النفسي .. هههههههه .. ** محمد مسعد : بالتأكيد مادام من وجهة نظرهم .فأهل مكة أدرى بشعابها. . .. ** منة عامر : ندخل بقى على الرعب وعالم الروحانيات ونروح نخبط على أبواب الجحيم ونشوف ايه اللي ممكن يكون ورا الباب ده هل هو زي ما بنسمع وزي ما قرئنا في كتب وراويات كتير انه معنى كلمة جحيم هي النار فقط التي خلقها الله لتعذيب الكافرين به والمذنبين من عباده.. ام جحيم آخر من وجهة نظر الروائي أ/ محمد مسعد .. هنبتدي اولا بأتجاهك بخيالك وتفكيرك في دخول العالم ده ايه اللي خلاك تكتب عن الجان ؟؟ ** محمد مسعد : على أبواب الجحيم فى البداية كانت قصة قصيرة حاولت ارصد فيها فكرة إن الإنسان أقوى من الشيطان لو إتقابلوا فى معركة واقعية بشكل ملموس تطورت القصة لفكرة رواية خصوصاً لما كنت بجهز لكتابة القصة ووقع فى إيدى كتاب عالم الجن والشياطين للدكتور عمر سليمان الأشقر بدأت رحلتى فى البحث عن اى مراجع وكتب بتناقش فكرة وجود الجن والشياطين قرأت كتير من وجهات النظر سواء وجهة النظر الدينية او وجهات النظر الأخرى حبيت إنى أرصد حالة معينه لعالم الجن بصورة شبه منطقية غير مبالغ فيها خصوصا بعد إنتشار فكرة إن الجن لا يقاوم ولا يقهر غير بالجن وإن السحر مالهوش علاج غير بالسحر والكلام ده غير صحيح بالمرة من هنا كانت بداية رحلتى مع على ابواب الجحيم أما فكرة الجحيم فمعروف ان الجحيم مش النار وعذابها بس الجحيم من وجهة نظرى له معنى كبير بتتنوع أشكاله وأوصافه وحالاته .. ** منة عامر : عايزين نعرف اكتر عن مصارد الرواية وياريت تقولنا على اسماء بعض المصادر وايه الكتب اللي ممكن اي حد يقراها من غير تعاويذ وطلاسم بحيث انه يثقف نفسه ويحصن نفسه من شر الجان ..؟؟ ** محمد مسعد : زى ماقلت فيه كتاب عالم الجن والشياطين للدكتور عمر سليمان الأشقر والبداية والنهاية لابن كثير وفيه حقيقة الجن لسيد قطب وفتح المنان لشيخ الاسلام بن تيمية وكتير من الكتاب اللى تناولوا القضية بموضوعية ومنهجية .. ** منة عامر : انا طبعا مش عايزة احرق الرواية بس انا من اشد معجبينك بثقافتك الواسعه في عالم الجان وكل حاجه عنه .. بس هل انت دلوقت اصبحت ملم بكل شيئ بمعنى الكلمه في عالم الجان ولا لسه في كتير انت لسه مقرتش عنه ؟؟ ** محمد مسعد : للأسف الشديد لا عالم الجن عالم غيبى التعامل معاه مبنى على إفتراضات ووقائع كتير مننا بينفيها وبينفى وجودها بالرغم من وجودها فى الديانات السماوية الثلاثة بحاول إنى أتعمق فى البحث خاصة وإن الجزء الأول للرواية كان مجرد بوابة للعبور علشان الجزء التانى واللى شايف انه هيكون اهم من الجزء الأول لأن الحرب والقضية فى الجزء التانى متعلقة بكل واحد مننا فى الوقت الحالى .. ** منة عامر : معنى كدة ان الجزء التاني في احداثه تغلبها الواقعيه ؟؟ ** محمد مسعد : الجزء الأول كان فى الغالب مابين عالم الجن وعالم البشر الجزء التاني هتكون أحداثة فى عالم البشر بالرغم من وجود ابطال كتير من عالم الجن الجزء التانى هحاول فيه الدمج مابين الواقع اللى احنا عايشينه ومابين الخيال كمان هحاول إثبات بعض الأحداث اللى حصلت فى الماضى واحداث بتحصل فى الحاضر من خلال فكرة ان التاريخ بيعيد نفسه فى بعض الأحيان ده طبعاً من خلال طرح احداث ووقائع كلها ليها علاقة بعالم الجن .. ** منة عامر : ان شاء الله تخلصه على خير استاذنا .. واحنا منتظرين الجزء الثاني لرواية على الجحيم عشان نعرف من خلاله إزاى نقدر نقف قدام اعدائنا سواء كانو من الانس او الجن .. ** محمد مسعد : يارب بإذن الله .. ** منة عامر : انا مش هقولك تقول ايه للناس اللي بتروح للسحره والدجالين عشان يعملوا اعمال او يخرجوا جني مس انسان .. انا هقولك تقول ايه للسحره نفسهم .. عايزين نعرف من وجهة نظر حضرتك السحرة دول ايه بظبط ؟؟ ** محمد مسعد : الاول قبل ما اقول رسالة لأى واحد بيمارس السحر أو على إتصال بالجن احب أوضح إنى قبل ما اكتب اى كلمه عن السحر والسحرة كان لازم إنى اشوف العالم ده عن قرب علشان يكون الحكم منطقى فيه ناس الظروف هى اللى حكمت عليهم انهم يدخلوا العالم الغريب ده ناس منهم كتير تابوا لربنا ورجعوا يكفروا عن كل الذنوب اللى عملوها وناس كتير منهم استمروا فى عبادة الشيطان وأتباعه, حياة الساحر كلها ضلال في ضلال وتعب مفيش ساحر بجد يقدر يتحكم فى أى شئ الأمر مجرد عقد مابين الشيطان والساحر كل ما الساحر يزيد كفره بالله وشركه بيه يرضى عنه الشيطان ويخلى خادم من خدمة يساعد الساحر في إيذاء الناس صفقة خسرانة وفى النهاية هيكون مصيرة جهنم وبئس المصير الساحر ضعيف عاجز لايملك من أمره شئ ,حقده على الناس هو اللى خلاه يسجد للشيطان. كلمة لكل واحد دخل العالم ده وسجد للشيطان اللى رفض إنه يسجد لأدم عليه السلام إبليس بسجده واحدة إتحرم من الجنه واتكتب عليه انه يكون مخلد في النار وانت يامسكين بسجدة واحده اتحكم عليك انك تكون معاه فى نار جهنم بس ربنا فاتح قدامك باب التوبة إنقذ روحك وإرجع لربنا لأنه هو الغفور الرحيم .. ** منة عامر : كلام حضرتك مظبوط وده كلام للناس كلها وكل الناس اللي هتقرأ اللقاء ده ياريت يوعظوا امهاتهم وأبائهم وأى حد فى إنهم ميتعاملوش مع السحره لان ممكن يكون الساحر ده جاهل باللي هو بيعمله او ممكن يكون مابيفهمش شيئ في السحر نهائي وإما انه يكون نصاب أو جاهل باللى هو بيعمله .. وفيه سحره فعلا بيأذوا الناس عن حقد من جواهم وحسد على حياتهم لانهم زى انت ما ذكرت بمجرد ان الساحر يسجد للشيطان ويصبح من اتباعه هايبقى زيه بظبط في كل شيئ والشيطان احقد خلق الله على بني الانسان .. ** محمد مسعد : بالتأكيد بتمنى ان رسالتى دى توصل لكل الناس .. ** منة عامر : ان شاء الله .. اخر سؤال لحضرتك وانا عارفه اني طولت عليك بس حضرتك من الادباء المثقفين اللي يخلوني ابقى مستمتعه بالحديث معاهم .. ** محمد مسعد : ربنا يخليكى دة شرف ليا اكيد والله .. ** منة عامر : حضرتك من خلال متابعتك للشباب وللأدباء الحاليين مين اكتر واحد عجبك أسلوب كتابته ومناقشته للقضايا فى أعماله الأدبيه وبدأت انك تتابع كتاباته ؟؟ ** محمد مسعد : القائمة كبيرة فيه أسماء كتيرة قرأت لها أعمال مميزة مش عارف أبدأ منين بس لو هقول أسمائهم يبقى دكتور عمرو مرزوق وأستاذ وائل الخطيب أستاذ محمد الجيزاوى وأستاذ محمد الصفتى ، دكتور محمد نجيب أستاذ محمود وهبة ، محمد عبدالوارث ،إسلام عبدالحليم دكتورة منى حارس ومنى سلامة الأسماء كتير والقائمة طويلة بجد فيه كتاب كبار وأدباء شباب ناس منهم أحدثت تغيير فى الوسط الثقافى وناس كتير بتوقع إنه هيكون ليهم شأن كبير فى القريب العاجل .. ** منة عامر : واحنا وكل القراء بنتمنالك انت وكل الادباء الحاليين اللي حضرتك ذكرت اسمائهم بنتمنى لهم التوفيق والنجاح والشهرة وبنتمنى انهم يمدوا يد المساعده لكل الشباب اللي عندهم موهبة الكتابه في الادب الروائي والقصصي والاشعار والخواطر .. وبنتمنى لحضرتك النجاح والازدهار في حياتك من كل الجوانب .. وسعدت جدا باللقاء ده وتوعدنا يكون فيه لقاء بعد نشر الجزء الثاني لأبواب الجحيم بإذن الله .. وشرفتنا على طاولة ادباء 2000 .. اهلا وسهلا بيك معانا دايما وان شاء الله في تألق ونجاح دايما .. ** محمد مسعد : بالتأكيد يشرفى ويسعدنى إنى أكون موجود بالقرب من أدباء ٢٠٠٠ سعيد جدا بلقائك وأتمنى لحضراتكم النجاح والتوفيق دايما .. ** منة عامر : وشرفتني انا على الجانب الشخصي وشرف ليا ان اول لقاء لفقرة ( لقاء مع أديب 2000 ) يكون مع حضرتك .. أ/ محمد مسعد .. ** محمد مسعد : متشكر جدا لحضرتك وسعيد إنى كنت فى اول لقاء لمجلة أدباء ٢٠٠٠ سعيد أكتر بحوارى مع حضرتك أستاذه منه متشكر جدا لحضرتك مرة تانية .. ** منة عامر : الشكر ليك استاذنا .. و شكرا لكل القراء والشكر والتقدير لكل الأدباء الموهوبين اللي ساعدونا في بناء مجلة ادباء 2000 .. انتظرونا في القريب لقاء مع أديب 2000 جديد ..