لقاء مع أديب 2000 - بكر عبد الرحمن

بدايتنا في لقاء مع أديب 2000  النهاردة هتبدأ من روما .. بداية غير كل بداية .. بدايته جريئه وغريبه ومشوقه وتشدك ليها مع كل حلقه من حلقاتها .. بدايتنا النهاردة في لقاء مع أديب 2000 مع (( بكر عبدالرحمن )) .. اهلا وسهلا بيك معانا

** بكر : اهلاً بيكى وبكل متابعينك ومتابعين مجلة ادباء 2000 وشكراً ليكى ولأسرة المجله على اختيارى لعمل لقاء ..

** منة عامر : الشكر والتقدير لحضرتك احنا دايما بنرحب بكل الشباب الموهوبين اللي زي حضرتك واللي سابو علامه وبصمه مع متابعينه من خلال روياته ..

** بكر : الشكر لله ربنا يخليكى ..

** منة عامر : اول حاجه عايزاك تعرفنا بيك اكتر أبتديت أمتى في كتابة روياتك الغامضه اللي هنتعرف عليها من خلال اللقاء وعايزين نعرفك اكتر .. عرف نفسك لكل متابعينك ؟

** بكر : أسمي بكر عبد الرحمن

25 سنه من مواليد محافظة الأسكندريه

وحالياً مقيم فى الجيزه ..

بدأت كتابه من خمس سنين كنت بكتب كلمات اغانى وحاولت احترافها وبدأت اتعاون مع مطربين لكن توقفت لأحساسى بحرمانية كتابة الأغانى وحولت كتاباتى لشعر بالعاميه..  عادى كنت بنزله على الفيس لحد من حوالى 3 شهور بدأت اكتب روايات عباره عن حلقات ..

** منة عامر : كلمنا عن روياتك وياريت تبدا من بداية فيلا 321 وليه أخترت الاسم ده ؟

** بكر : فيلا 321 كانت فكره جاتلى بعد ما خلصت رواية مسدج وكانت عباره عن جريمه بوليسيه غامضه حصلت فى فيلا والرقم كان عادى للتشويق مش اكتر ..

** منة عامر : ايه الحاجه اللي شجعتك تكتب في الغموض .. انت قلت انك كنت بتكتب شعر واغاني .. واتوجهت بعدها لكتابة الغموض ؟

** بكر : بصى انا من عشاق تامر حسنى أحساسى فى مسلسل فرق توقيت وانا بضحك على نفسى فى اخر حلقه من انى بدور على قاتل فى مسلسل 30 حلقه ويطلع غير ما انا توقعت كان احساس ممتع جداً دى اكتر حاجه خلتنى اكتب فى الغموض ..

** منة عامر : اممممم يعني نقدر نقول ان تامر حسني هو ملهمك في كتباتك ؟

** بكر : مش بالظبط لكن تامر حسنى انا اتعلمت منه انى اجتهد جداً فى الشغل اللى بعمله واحاول ابتكر فيه وادور على افكار جديده ..

** منة عامر : هو طبعا حاجه جميله انك تشوف حد ناجح وتتعلم منه ازاي تجتهد ..

** بكر : ربنا يخليكى..

** منة عامر :: كلمنا عن مسدج ؟

** بكر : الفكره بتاعت مسدج جاتلى  لما افتكرت واحد صاحبى كان بيحكيلى عن واحد يعرفه مراته اتعملها عمل من حبيبته الأولى .. كنت فى الأمتحانات وبعدت شويه عن الناس عندى اللى بيتبعونى كاشاعر ولما خلصت امتحانات ونزلت بوست على الفيس حسيت انى محبوب منهم اوى فكنت عايز افرحهم بحاجه جديده .. مكونتش متخيل ان الناس هتابعها للدرجه دى افتكرت ان حلقتين 3 و مش هلاقى حد بيتابع وهكبر دماغى ..  بس لقيت المتابعين لمسدج كتير والساعه 12 الناس بتكون مستنيه الحلقه ويبعتولى عشان انزل حلقه جديده ..

** منة عامر : حلو جدا انها تعجب الناس المتابعينك .. جميل جدا وان شاء الله نجاحك ده يوصل لكل الناس ..

** منة عامر : بكر عبدالرحمن وهو بيكتب روياته بيعيش مع الابطال والقصة وبيتجسدو قدامه وهو بيكتب ولا بتكون مركز فقط ف احداث الحلقه اللي بتنزلها ومجرد الهام بيجي في تفكيرك بتكتبه ؟

** بكر : لازم احضر الفكره من اولها لأخره وبتخيل الشخصيات كلها وكلامهم وبوزع الأحداث على الحلقات

كل حلقه بكتبها بعيش جواها كا كاتب وبعد ما بخلصها بقراها كا قارئ ..

** منة عامر : بتشوف نفسك في ابطالك جوا روياتك .. ولو بتشوف نفسك في اي حد من الابطال قولنا ع كل بطل في كل رواية شفت نفسك فيه ؟

** بكر : شوفت نفسى فى سيف فى طلسم روما و شايف نفسى فى بدون إسم لكن مش هحرق احداثها ..

** منة عامر : جتلك فكرة طلسم روما من احداث واقعيه ولا من خيالك فقط ؟

** بكر : لا من خيالى وانا بسمع اغنيه جت فى بالى الفكره واتطورت ..

** منة عامر : طيب احكلنا عن تجربتك في كتابة الاغاني ومين المطربين اللي اتعاملت معاهم ؟

** بكر : بدأت كتابة الأغانى بسبب حب قديم والموضوع اتطور معايا بعد كتابة اول اغنية كانت اسمها سهران لما قولتها لصحابى وعجبتهم بدأت اكتب اكتر وكتبت كذا أغنيه وكنت بدأت اشتغل مع مطربين عاديين مش مشهوريين يعنى كان من ضمنهم مطرب اسمه رامى نور كان بيحضر البومه وطلب من 4 أغانى وبعد ما كتبتهم اترجعت عن الكتابه وقررت انى مش هكتب اغانى ..

** منة عامر : والحب القديم تحب تتكلم عنه  ؟

** بكر : حب عادى ومحصلش نصيب الحمد لله ..

** منة عامر : وده هيخليني أسالك .. أيه أكتر حاجه حصلت في تاريخ حياتك أثرت فيك وغيرتك او غيرتك فيك حاجات كتير ؟

** بكر : جايز الحب القديم ده يكون اثر عليا بالسلب ..

** منة عامر : ازاي ؟

** بكر :  عادى يعنى اخدت قرارات غلط بعديه اثرت عليا ..

** منة عامر : امممم .. في كلامنا قبل اللقاء بتعنا كنت قولتلي انك مش حابب تنشر رواياتك نشر ورقي .. ليه ؟

** بكر : اغلب دور النشر فى الوقت الحالى بقى همها الربح فقط وده شئ انا ضدده مبقولش انى ميدوروش على ربح لكن مينفعش الروايه او الديوان تكون ب 35 جنيه المبلغ ده فوق قدرات ناس وطلبه كتير ولو ميقدروش ينزولو السعر عن كده يبقى ملوش لازمه النشر من اصله يبقى النشر الألكترونى افضل ولازم دور النشر تتواصل مع وزارة الثقافه عشان يبقى فى دعم للنشر عشان نقدر ننشر الثقافه ..

** منة عامر : رائيك سليم وتمام جدا واحنا كمان ده هدفنا اننا نحاول نوصل لكل الشباب اللي مش عارفين ينشروا روياتهم ويوصلوها للناس ده هدف مجلة أدباء 2000 ..

** بكر : ربنا معاكم ان شاء الله بس انا مقدرش انكر ان فى دور نشر محترمه بردو ..

** منة عامر : قولنا بقى بدون أسم ليه اخترت الاسم ده للرواية الجديده .. وشايف ان روياتك تشبه لمسلسلات يوسف الشريف من نحية الغموض ولا انت بس من معجبين يوسف الشريف ؟

** بكر : اسم الروايه الغامضه عامل زى المعادله الصعبه لازم يجمع بين حاجتين مجمل الروايه والغموض بدون اسم بيحقق المعادله دى .. اما بالنسبه للعبقرى يوسف الشريف فا انا متفرجتش على مسلسلاته غير الصياد بعد ما خلصت مسدج ولقنى لقيت الناس بتشبه غموض الروايه بيه ..  واتفرجت على لعبة ابليس بعد طلسم روما .. وبصراحه استمتعت جدا" بيهم ..

** منة عامر : انا ك قارءه لطلسم روما حسيت فعلا انها تشبه لمسلسل رقم مجهول والمجهول وبحييك على اسلوبك في الكتابه واحب اعرف كل متابعين مجلة أدباء 2000 ان روايات الكاتب المبدع الغامض بكر عبدالرحمن هتكون معانا قريبا في دار النشر الاليكترونيه هننشرها لكل محبين بكر عبدالرحمن بصيغة ال PDF وان شاء الله تنول اعجاب الجميع ..

** بكر : ربنا يخليكى يا منه الشرف ليا والله ..

** منة عامر : ربنا يوفقك ان شاء الله ومن نجاح لنجاح .. وعايزة اعرف منك والدك أنت كتبت عنه ف الإهداء انه هو علمك ان مافيش مستحيل .. احكلنا عن علاقتك بيه واتعلمت منه ايه ؟

** بكر : علمنى اعتمد على نفسى من صغرى انى اكون راجل و اواجه اى مشكله الأول كان الموضوع مضايقنى لكن بعد كده فرق معايا لما عرفت قيمة انى اعتمدت على نفسى من البدايه وعلاقتى بيه كويسه زمان طبعا" لما كنت صغير كنت بتضايق انه بيطلعنى من الشارع وكده بس دلوقتى الموضوع اتغير خصوصاً كمان انى اغلب الوقت مسافر لكن بشكل عام هو أعز حد عندى ..

** منة عامر : الله عليه والله ده رجل لازم كل الناس تقدره وتقدر امثاله لانه نمى فيك كل حاجه كويسه تؤهلك انك تكون انسان يعتمد عليه ويعمل لنفسه مستقبل مشرف ..

** بكر : معنديش جوانب غامضه فى حياتى انا زى الكتاب مكشوف للكل ..

** منة عامر : طيب نيجي بقى للأسئله الأساسيه اللي دايما بنسئلها .. راضي عن نجاحك لحد دلوقت .. وشايف نفسك ايه ف المستقبل .. وهل مخطط لأهداف عايز تعملها في المستقبل ان شاء الله ؟

** بكر : الحمد لله ولو انى شايف انى لازم اجتهد اكتر .... مش شايف نفسى فى المستقبل لأنه بأيد ربنا وبصراحه بقيت بخاف احلم ..... واكيد عندى اهداف سواء كتابه او كا حياه عاديه ..

** منة عامر : واحنا بنتمنالك كل نجاح وتوفيق في حياتك وان شاء الله تحقق كل اللي بتتمناه ومجلة أدباء2000 دايما معاك ان شاء الله وباذن الله نفضل مستمرين في نشر روياتك الجميله الغامضه اللي انا معجبه بيها جدا .. هقولك دلوقت توجه رساله شكر لمين في نهاية لقائنا الجميل ده ؟

** بكر : طبعا" بشكرك وبشكر كل فريق مجلة ودار نشر ادباء 2000 على ثقاتكم فيا وبشكر خطيبتى واهلى واصدقائى  وبشكر كل اللى بيتبعونى وكل اللى هيقرو اللقاء وبقولهم استنو رواية بدون إسم ووعد منى هتكون احسن من مسدج وطلسم روما و يارب اكون كنت ضيف خفيف عليكى وعلى قراء اللقاء ..

** منة عامر : كلنا منتظرين رواياتك الجديده (( بدون أسم )) .. وهنتابعها ان شاء الله وانت فعلا ضيف وكاتب خفيف والله وكل فريق عمل المجلة بيبعتولك تحياتهم واعجابهم برواياتك ويارب احنا اللي نكون ضيوف خفاف على قلبك وان شاء الله نستمر في التعاون مع بعض .. وبالتوفيق في الرواية الجديده

** بكر : شكرا . . ربنا يخليكي

** أنتهى لقائنا مع الأديب والروائي الشاب الصاعد الواعد (( بكر عبدالرحمن )) .. انتظرونا في لقاء جديد مع أديب جديد من مجلة أدباء 2000