لقاء مع أديب 2000 المخرج المسرحي محمد عبدالوارث - الجزء الاول

2000لقاء مع أديب 

اللقاء السابع مع أمبراطور المسرح القادم .. ومع صاحب رواية أقفز .. مع صاحب حلقات السجين ..

مع ال DON (( محمد عبد الوارث ))

** منة عامر : احمد عبدالوارث !!

** عبدالوارث : لا محمد عبد الوارث ..

** منة عامر : لا احمد لأني فعلا بحس أنك شكلك احمد مش محمد مش عارفه ليه ..

** عبد الوارث : ههه لا أحمد ده يبقى اخويا ..

** منة عامر : بجد كل لما بكتب اسمك على برومو منزلاه ليك بلاقي أيدي بتكتب أحمد مش محمد ..

** عبد الوارث : بصي ده مش عندي مصر كلها محمد واحمد .. ودي حاجه كويسه وبعدين اصلا انا اسمي (( محمد سيد عبد الوارث  )) ..

** منة عامر : تمام يعني أسم الشهره ( محمد عبد الوارث ) .. ؟

** عبدالوارث : تمام كده وبعدين الناس بقت تختصر وتقولي عبدالوارث .. والقريبين مني بيقولولي وارث على طول .. يعني تحسي اني مبقتش موجود جدي هو اللي أتشهر ..

 ** منة عامر : ههههه ... الشباب عموماً بينهم وبين بعض بيختصرو الاسامي بتعتهم كتير جدا ..

** منة عامر : مش هبدأ أسألتي معاك عن التأليف او المسرح انا هبدأ بأني عايزة اعرف محمد مع عائلته بيبقى بالحماس والنشاط والحركة اللي بتبقى فيها في شغلك والمعهد والفرحه اللي دايماً بنحسها معاك في لقائاتك وكلامك واسلوبك ولا ايه ؟

 ** عبد الوارث : لا انا ضيف في البيت .. هما دايماً بيقولولي انت مأجر اوضة عندنا .. أغلبية الوقت انا ببقى بره مابين دراستي في المعهد العالي للفنون المسرحيه ومابين شغلي بره النشاطات وكل حاجه من دي .. برجع لكن بما اني اكبر اخواتي فا ده بيحطني في مواقف زي الحضور للمناسبات الاجتماعيه اللي بكرها جدا ً .. لازم احضرها لكن في نفس الوقت انا مع عائلتي بشكل مختلف في بينا كل حاجه حلوة .. ومع والدي في ما بينا صداقة جميلة ولكن في رهبه جوايا ليه مراحتش مع مرور الوقت ولا لما كبرت .. في لحد دلوقت جوايا رهبة الأب .. والحمد لله علاقتي بعائلتي كلهم كويسه جداً ..

** منة عامر : أنت قولت دلوقت انك بتكره المناسبات الرسميه بتكرها جدا أزاي انت كاتب مسرحي ونصوص مسرحية المفروض ان حاجه زي كدة متبقاش كارها ؟

 ** عبدالوارث : انا عايز اقولك ان لحد اخر دقيقه قبل انا ببقى لابس هدومي العاديه بغير هدومي في اخر دقيقه اللي يشوفني وقت العرض يقول عليا اني حد من الناس اللي بيشتغلوا في العرض ورا الكواليس .. لحد الدقيقه اخر دقيقه بغير وبلبس البدله وببقى محمد عبدالوارث مخرج العرض .. انما قبل كدة مافيش .. المناسبات الرسميه بقى التانيه اللي زي الافراح العزومات الكلام من ده مش بحبه ..

** منة عامر : بما انك مخرج مسرحي وممثل .. انا واحدة من الناس معنديش الملكة أني اقف على المسرح قدام الناس والناس وأقف أمثل قدام الناس .. انت ازاي بتعمل كده وبدأت معاك من أمتى أنك يبقى عندك الملكة دي ؟

** عبدالوارث : رهبة التمثيل هي أكبر رهبه موجودة في الدنيا .. لأن من الصعب انت تختبر نفسك قدام الناس .. وفرق كبير بين التليفزيون وبين المسرح .. التليفزيون فيه شاشه بتفصلك عن الممثل .. لكن مع المسرح الموضوع مختلف .. يا تقولي أه وحش يا تقولي أه حلو .. وفي نفس الوقت بدات من صغير شاركت في مسرح التربيه والتعليم لحد سن رابعه ابتدائي او خمسة ابتدائي .. لحد تانيه ثانوي خرجت من إطار المدرسة لإطار أكبر شويه اللي هو الإدارة على مستوى الجمهورية ووقتها اتعرفت على أستاذي وحبيبي الأستاذ (( الحسن محمد )) من  وقتها وهو متوليني تماماً .. وقتها كنت بعرض (( مسرحية الملك هو الملك ))  .. كنت بعمل شخصية الملك واخذت عنها افضل ممثل على مستوى الجمهورية لطلبة المدارس  ..  العرض بتعنا كان  من افضل العروض وقتها بدأت أخرج من وقتها لحد دلوقتي .. مشوار حوالي 10 سنين  ..

** منة عامر : 10 سنين بتمثل وتخرج وتكتب نصوص مسرحية وروايات .. دي حاجه جميلة انك بدات من سن صغير وسنين دي تشهدلك بكل حاجه عملتها من نجاحات

طيب بما أنك شاب لسه في البداية بتوفق  بين شغلك والمسرح والكتابة ازاي ؟

**عبدالوارث : مش هكدب عليكي واقولك بقى الكلام الجميل بتاع تنظيم الوقت  واني لازم انظم وقتي لا مش كده خالص .. انا مش باجي على حاجه عشان خاطر حاجه كل حاجه وليه الاولويه فا الاولويات دي اللي بتفرق معايا ..يعني لما بيكون عندي عرض مسرحي دلوقت مبكتبش جنبه رواية .. لو بكتب رواية ممكن اعمل حاجه جنبها لان الروايه بكتب حبة وبستنى حبه وفي نفس الوقت لو بصيتي لزمان هتلاقي ان اليوم كان كبير

** منة عامر : فعلا اليوم كان زمان كان ليه بركه وكنا بنعمل فيه مليون حاجه ..

** عبدالوارث : الفكرة كلها انك تعرفي  ازاي تعرفي تشتغلي في الوقت ده ..

** احكلنا عن (( أقفز )) ؟؟ انا عايزاك انت اللي تحكي انا مش هتكلم عنها الاسم نفسه غريب وجميل جدا ويشد ؟

** عبدالوارث : الموضوع بدأ ازاي اولاً الرواية تعتبر نقطة فصيله في حياتي .. مبسوط بيها جداً جداً لأنها اول رواية ..تعتبر أبني الأول في الموضوع ..الفكرة جت أني كنت بتناقش مع واحد صاحبي .. هل الأنسان على  الأرض ليه رساله ولا لعنه ..يعني احنا متواجدين على الارض لينا رساله ولا لعنة على الارض .. في القرآن الكريم الملائكه بتتحدث الى ربنا سبحانه وتعالى لما بيعلموا بأن الله سيخلق سيدنا آدم قالوا (( 'وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ۖ قَالُوا أَتَجْعَلُ فِيهَا مَنْ يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ ۖ قَالَ إِنِّي أَعْلَمُ مَا لَا تَعْلَمُونَ (30)' [سورة البقرة])) الملائكه قالت حاجه غريب أن احنا لو نزلنا على الارض هنعمل حاجات كتيرة اووي وللأسف الحاجات دي بتحصل دلوقتي .. ولكن ربنا قال ((' ۖ قَالَ إِنِّي أَعْلَمُ مَا لَا تَعْلَمُونَ  )) ايه اللي ربنا عارفه والملائكه لم تكن تعلمه .. دي اول حاجه .. تاني حاجه الكلمه الاولى التي قالها الله للملائكه قال(( أني جاعلاً في الارض خليفه )) .. الناس اللي بتيجي فجأءه وبتروح فجأءه جتلي الفكره بتاعت الرواية من هنا وده اللي اتكلمت عنه في حفلة التوقيع .. جتلي فكرة لو البني آدم حصله موقف معين .. حياته بتختلف تماماً عن حياة أي بني آدم تاني هل البني آدم أتميز أنه له رساله ولا لعنه عليه ..

** منة عامر : يعني أنت تقصد أن ربنا خلق الأنسان هل خلقه انه يعيش الحياة على الارض دي ميزة وحكمة ولا لعنة من ربنا على الانسان ..

** عبدالوارث : انا مش هفصل في الجدال ده ..لان ده موجود في الرواية لما القارء يقرأ الرواية هايعرف فكرة أقفز والأسم بتاع أقفز ..

على كل المستويات هو بياخد صيغة أمر ( أقفز )) طيب هقفز لفين بمعنى أنتحر ولا أقفز بشكل بشكل معنوي عن كل بكل الافكار اللي جوايا ولا بشكل نفسي وأقفز جوايا وأنسى الناس ..ده كله هتلاقوه جوا الرواية .. مبدأياً روايتي واللي دايما بقولو في اماكن الكتب والروايات اللي فيها روايتي انك في الرواية هتلاقي السؤال الاشهر بالنسبالي ..من كل اللي قرأوها (( هي الرواية دي حقيقيه ولا من الخيال ؟ )) لان الرواية الى حدا كبير طبيعيه اوي ..

** منة عامر : هي فعلا من أٍنها تحس انها من الواقع ..

** عبدالوارث ..ببساطه شديديه جدا الاشخاص والاحداث ممكن مش تكون حقيقيه ..لكن المشاعر اللي موجوده دي مشاعر ناس بجد .. لاني اثناء كتابتي للرواية كنت بسأل الناس عن مشاعرها في مواقف معينه ..عشان لما احط الشخصية ببتعتي احطها على الورق ..لازم اكون دارس وحاسس بالمشاعر دي كويس جداً سواء الفرح او الحزن او الرومانسيه ..او الدراما او الرعب كل الحاجات دي مشاعر حقيقيه حصلت للناس بجد ..

   
أنتظرو الجزء الثاني والثالث من لقاء أمبراطور المسرح القادم