لقاء مع أديب 2000 - صفاء حسين العجماوي

لقاء مع أديب 2000 سوف يكون اليوم مع صاحبة القنابل القصصيه .. لها همسات من الخيال الجميل .. سوف تاخذنا معها في خيالها لكي نعرف ما حدود هذا الخيال .. معنا صاحبة الهمسات الكاتبة المبدعه (( صفاء حسين العجماوي )) .. اهلا وسهلا بيكي

** صفاء حسين: اهلا و سهلا و مرحبا بالمجلة الحبيبة أدباء 2000 و بالقراء الاعزاء ,و اتمنى ان اكون ضيفة خفيفة عليكم ..

** منة عامر : حضرتك ضيفه غاليه ومشرفانا بقصصك ومقالاتك الجميله معانا في المجله  ..

** صفاء حسين: الشرف ليا انا ,و انا اعتز بيكم جميعا ..

** منة عامر : هسألك بداية أسئلتي بصراحه عندي فضول جامد جدا اعرف كل حاجه عن القصتين اللي كانوا في بداية حياتك .. (( رحلة داخل الثقب القافز )) و (( الوشم المقدس )) ياريت تحكلنا عنهم وازاي وامتى والفكرة بتاعتهم ؟

** صفاء حسين: اسعدتينى بالسؤال عن القصتين دول لانهم بداياتى فى عالم النشر و لا نهم فى مجلتى الحبية مع استاذى العزيز رؤوف وصفى

القصتين من ادب الخيال العلمى

القصة الاولى (رحلة داخل الثقب القافز) هى قصة بتكلم عن الفضاء و الثقوب السوداء و رائد فضاء عربى ,و فيها قسمت الفضاء بين الدول ,الفكرة جتلى لانى مدمنة فلك و رغبتى فى أثبات تفوقنا العربى و ابراز اهمية الاسرة و الحب الاسرى و الحمد لله وفقت فيها

اما قصة الوشم المقدس فكان اسمها الاول من اجل بلادى بس دكتور رؤوف وصفى اختار لها اسم الوش المقدس و القصة بدور فى عالم مصر القديمة و العوالم المتوازية و التضحية بالنفس من اجل البلد ..

** منة عامر : اهاااا لا انتي كدة شوقتيني اكتر لقرائتهم ...

** صفاء حسين: اتمنى يعجبوكى و يعجبوا القراء و ممكن نعيد نشرهم فى مجلتكم , و غالبا هعيد نشرهم فى مجموعتى القادمة باذن الله ..

** منة عامر : ان شاء الله وهنتكلم عنها ان شاء الله ..

** صفاء : بأذن الله ..

** منة عامر : طيب قوليلي ليه الخيال بتكتبي فيه والفضاء يعني مثلا الكوميديا في حياتك مفكرتيش تكتبي عن المواقف الكوميديه اللي حصلتلك في حياتك ؟

** صفاء حسين : حقيقة مفكرتش الا بعد الموقف الى حصلى امبارح فى رحلتى لحفلة التوقيع فى اسكندرية ,و ده بعد طلب استاذى العزيز محمد بن يوسف كرزون ..

** منة عامر : بجد طيب ياترى هتكون اول تجربة في كتابة الكوميدي ؟

** صفاء حسين : فعلا او تجربة ليا فى الكوميدى .انا كتبت تقريبا فى كل الانواع الا الكوميدى و بصراحة قلقانة جدا ..

** منة عامر :  طيب هتعملي ايه بقى بما انك من الادباء اللي نزلت ليهم قصص وكتب وليكي تجربة الكتابه والنشر تنصحي الشباب ب ايه في حاجه زي كدة ؟

** صفاء حسين : اول نصيحة متستعجلش النشر ,لان كل حرف هتنشره هيتحسب عليك ,اتأكد ان الى هتنشره يستحق اسمك يتحط عليه

التانية عشان تكون كاتب مميز لازم تكون قارئ شره جدا مفيش كاتب كويس معندوش موسوعة من الكتب الى قراها فى عقله و قلبه و وجدانه و قلمه ,لان الكتابة هى مزج القلب بالعقل بالوجدان و الروح و الثقافة و الشخصية

الثالتة تدريبات الكتابة يداوم عليها و يكتب كل يوم نص ساعة و يجرب قلمه فى كل مجال لحد ما يستقر للمناسب ليه ..

** منة عامر : رائيك جميل ونصايحك اجمل واكيد الشباب المتابعين لمجلة أدباء2000 هياخدوا بنصايحزكل الادباء اللي اصبح ليهم شان ومكانه في الوسط الأدبي  ..

** صفاء حسين : الله يبارك فيكى و فيهم و اتمنى للجميع التوفيق ..

** منة عامر : كنت قريت لحضرتك في الحساب الخاص بتاعاك عن نوت في ( سينارويهات نهاية الكون ) .. كان كلامك فيها بيعبر عن نهايات الكون في الافلام الاجنبيه .. عايزة اعرف منك رئيك اكتر في الموضوع ده ومن الناحيه الدينيه كمان ؟

** صفاء حسين : بحكم دراستى و خصوصا فى الماجستير (الفيزيا النووية )بندرس نماذج لنشأة الكون و نهايتها الى جانب ان الموضوع جدلى جدا ,من النهاية الدينية "ما أشهدتهم خلق السماوات و الارض و لا خلق أنفسهم و لا كنت متأخذ المضلين عضدا"..احنا كمسلمين بندرس الجانب المفيد من الدراسات دى للتطبيقات الحياتية و العلمية و لكن بنرفض اى شئ يمس العقيدة ,لان النماذج الى بيحطوها بتعتمد على علوم أخرى و تصرقات المادة فى كل حالاتها و عشان كدة مهم دراستها ..

** منة عامر : اها كلام فعلا لازم ندرسه والمفروض اننا احنا نقدمه بشكل ديني علمي زي ما ربنا وصفهولنا في القران الكريم وزي ما رسولنا الكريم تحدث به الينا في أحاديثه النبويه الشريفه بس ده طبعا مش هايحصل الا لو اجتمعت له علماء ودرس بطريقه توضح لكل الناس ما خي نهاية الكون الصحيحه عند المسلمين والاسلام ...

** صفاء حسين : بصى نهاية الكون فى العلم غير الدين بمعنى فى الاسلام بيشرحلك اهوال يوم القيامة ,لكن فى العلم بيقولك هتحصل ازاى و بالنسبة للعلم حاطط 3 سناريوهات ..

** منة عامر : اها اللي هما ذوبان الثليج وغرق العالم .. والاحتباس الحراري .. وانشقاق الارض على ما اظن او الغزو الفضائي على الارض ..

** صفاء حسين : لا خالص نهاية الكون بناءا على الكتلة الحرجة للكون كله و هى تلاتة الاولى لو كتلة الكون اقل من الكتلة الحرجة ,الكون هيفضل يتمدد بشكل لا نهائى و نتيجة التمدد هيموت كل شئ فى الكون بسرعةبالبرودة نتيجة بعد الكواكب عن شموسها و موت النجوم بطبيعة الحال من غير تولدها من جديد نتيجة البعد ,و التانية الكتلة الكونية اد الكتلة الحرجة و ده الكون هيستمر بالتمدد على نفس السرعة و هيموت بالبرودة زى السيناريو الاول الا انه ابطئ ,و الثالث لو كتلة الكون اعلى من الكتلة الحرجة و ده معناه ان الكون هيتمدد لحد معين و بعدين يرجع ينكمش لحد ما نوصل لحالة زى الانفجار الكبير و الى هى تحول المادة للجسيمات الاولى و هنا الموت بالحرارة الرهيبة نتيجة التصادم و الانكماش .. الى ذكرتيهم هى سناريوهات موت البشر و ليس الكون

** منة عامر : بصراحه انا مش بقرأ في الفيزياء او الفلك كتير بس بحب اتطلع وكمان انا بتكلم عن الافلام الاجنبيه الي دايما بتصورلنا نهايات الكون بالتجمد والانصهار ..

** صفاء حسين : افلام هوليود دايما بيكتبها واحد هاوى مش عالم فعشان كدة عنده خلط رهيب جدا بين سيناريوهات نهاية البشرية و سناريوهات نهاية الكون لان غروره بيصورله انه بفناء البشرية انعدم الكون و لكن الحقيقة احنا عنصر من عناصر الكون ربنا سخرلنا عناصره الاخرى لخدمتنا و منحنا العقل و العلم عشان نستفيد منهم ,و لانه قبل خلق الانسان كان فى كون بطبيعة الحال ..

** منة عامر : بحييكي على ثقافتك العاليه ومعرفتك بكل الامور التي بتدور حول الكون جميل جدا ..

** صفاء حسين: الله يخليكى ,ده من ذوقك ..

** منة عامر : طيب همسات من الخيال .. تقوللنا نبذه عنها ؟ وتشوقينا ليها اكتر ؟

** صفاء حسين : همسات من الخيال هى مجموعتى الاولى ,و عشان كدة هى لها مكانة خاصة جدا فى قلبى ,هى مجموعة قصصية متنوعة فيها انواع كتير من الادب فيها الرعب و الاكشن و الاطفال و الرومانسى و الفانتازيا و ماوراء الطبيعة و الخيال العلمى و الاجتماعى و ...,نقدر نقول مجموعة قصصية لمختلف الاذواق او مجموعة قصصية للاسرة ..

** منة عامر : حلو جدا انك تبدأئي بداية فيها كل الاختلافات في انواع الأدب وكمان تبقى لكل الأسرة مش الناضجين فقط ..

** صفاء حسين: انا اخترت تكون كدة لهدف اساسى ,اننا نغرس حب القراءة فى نفوس الاطفال و المراهقين ,لانهم هيقدروا يلاقوة قصة تعبر عنهم فى مجموعة خاصة بالوالدين و هيحسوا بانهم كبروا و بقوا زيهم و ده هيدفعهم للقراءة بحب ..

** منة عامر : طيب تعالي نبعد عن الخيال وننزل لأرض الواقع شويه .. لما بتبقي رايقه وبتحبي تدندني بقى كدة مع نفسك .. بتاخدي قهوتك وتقعدي تدندني كدة مع ام كلثوم مثلا ؟

** صفاء حسين : وقت الدندنة مع فيروز و مج نسكافيه باللبن و كتاب ,لكن اوقات كتير احب اسمع قديم يبقى ثومة و عبدالوهاب و اسمهان و نجاح سلام و الجيل القديم الرائع بس ميمنعش اسمع بعض الاغانى المميزة لمطربين جداد ..

** منة عامر : زي مين من الجديد ؟

** صفاء حسين : امال ماهر ,وائل جسار ,ملحم زين ,مروان خورى ,صابر الرباعى و كاظم الساهر

** منة عامر : كلهم اصوات ليها قيمة وتاريخ كبير طبعا بحيكي على اخيتارتك الجميله ..

** صفاء حسين: الله يخليكي ده من زوئك ..

** منة عامر : أيه اكتر حاجه بتأثر في صفاء العجماوي ؟

** صفاء حسين : أكتر شئ بيأثر فيا دموع طفل ممكن أبكى معاه ,و دموع الام كمان ..

** منة عامر : اوصفلنا حاله او موقف حصل معاكي وصلك للبكاء ؟

** صفاء حسين: صديقة عزيزة عليا اجهضت و الدكتور قالها مش هتخلف و ده كان طفلها الاول

انا عبرت عنها فى قصتى و توقفت الحياة الى اتنشرت فى جريدة التحرير الجزائرية..

** منة عامر : يعني نقدر نقول أن صفاء العجماوي قصصها وتأملاتها مش بس في الفلك والخيال والفضاء .. انما الحياة الواقعيه بتاثر فيها اكتر من الخيال ؟

**  صفاء حسين: طبعا الحياة الواقعية اهم و ساعات بتأثر فى خيالى لانى بستمد من الواقع قوة الخيال لتغيريه ,قصصى الاجتماعية او الواقعية هتلاقى فيها من الواقع كتير بس نسجت من خيالى احداث اكثر او غيرت فى الواقع ,قصة و توقفت الحياة عبرت عن شعورى انا لو كنت انا مكان الام دى و وصفت حاجات مش فى الواقع و لكن الاساس من الواقع ..

**  منة عامر : أكيد الواقع هو اللي أجبرنا أن يكون عندنا خيال نستمتع فيه بكل الالوان والاشكال وفيه منه اللي ممكن يتحقق على ارض الواقع لاننا بطبعتنا البشر ربنا خلق فينا روح المغامرة والاكتشافات واننا منعرفش المستحيل

 واحنا نيابة عن اسرة مجلة أدباء 2000 بنقولك اننا استمتعنا جدا مع حضرتك النهاردة في لقائنا الفضائي الفيزيائي الواقعي الجميل ده  ..

** صفاء حسين : و انا بجد استمتعت جدا بالحوار معاكم ,و اتمنى القراء يستمتعوا بيه ,و انا سعيدة جدا بالمجلة و انشطتها و اتمنالكم التوفيق ..

** منة عامر : واحنا كمان بنتمنالك التوفيق في حياتك العلميه والعمليه  .. وان شاء الله تخلصي الماجيستير على خير ونشوفك دكتورة كبيرة في علم الفلك ودايما مشرفانا في مجلتنا المتواضعه .. واخر كلامي معاكي لو تحبي توجهي رسالة شكر توجهيها لمين ؟

** صفاء حسين: اسمحولى برسالة شكر طويلة شوية

انا بشكر بابا الى علمنى حب القراءة و بشرك ماما لتشجعها الدائم و أرشادتها هى و بابا ,و بشكر اخواتى لمساندتهم و طبعا انا تالت واحدة تنشر فيهم الا اننا كلنا و الحمد لله مع بعض دايما ,بشكر اساتذتى الى علمونى و اسسونى فى كل العلوم و فضولى وقتهم فى حصص خارجية عشان يعلمونى كل ما هو خارج المقرر و شرح اى معلومة ممكن تفيدنى و تطورنى ,و بشكر دكاترتى فى الجامعة و اصدقائى و لقرائى الاعزاء ,و لولا الجميع مكنتش بقيت صفاء حسين العجماوى الى بتتحاور معاكم ,و شكرا ليكم على الحوار الممتع و الجو الادبى الجميل الى فى مجلتكم ..

** منة عامر : واحنا كمان بنوجهلك شكر خاص جدا من اسرة مجلة أدباء 2000 وكل القراء المتابعين لحضرتك وللمجله واهلا وسهلا بيكي وشرفتينا بوجودك معنا وشكر خاص مني انك سمحتيلي بالحوار الجميل المثقف ده وبنتمنالك  التوفيق في حياتك ان شاء الله وهنكون دايما من متابعينك استاذة صفاء ..

** صفاء حسين : انا احب اشكركم لان مجلتكم بحس انها مجلتى و ده نابع من حبىي ليكم و للمجلة و لانكم مجلة مختلفة و ادباء مميزين ..

** منة عامر : شكرا ليكي .. انتهى لقاء مع أديب 2000 وبنتمنى أننا نكون قدرنا نوصل لكم كل معلومه تستحق القراءه في مجالات كثيرة .. وبنشكر كل ماتبعين مجلة أدباء 2000 ..