الجزء الثاني من لقاء .. الموسوم .. محمد عبدالوارث

الجزء الثاني

** منة عامر :  بالنسبة للعروض المسرحية .. انت في يوم مثلا حصلك موقف معين صدمك وحسيت ان المسرحية دي مش المفروض انها كانت  تتعرض ؟

** عبدالوارث : لا مافيش عرض عملته وقولت عليه انه ماينفعش يتعرض اصل العرض مش بيطلع في يوم او اتنين او اسبوع بياخد وقت فكون ان عنصر او عنصرين منه يقع .. ده مش معناه انه مينفعش ينفع العرض يتعمل معناه .. انه لو كان اتعمل بشكل افضل مما كان عليه هايبقى احلى .. مافيش حاجه اسمها عرض وحش وعرض حلو .. فيه عرض جيد وعرض كان محتاج انه يتعمل بشكل افضل ده رأئي .. انما الموقف حصل اثناء عرض سحر الحياة . ده اخر عرض انا عرضته كان من سنه تقريبا .. وكنا اول عرض في كلية هندسة فرع الشيخ زايد .. كنا متفقين اننا هنعمل في المسرح هناك ومكناش متخيلين العدد كنا فاكرين انه عادي هايجلنا عدد زي كل مره اعلى عدد جلنا كان 300 ..

فادخلنا المسرح لاقيناه في 1300 متفرج .. فا كان بالنسبلنا عدد يخض ..

بس الحمد لله الليلة عدت والمسرحية عجبت الناس .. اللي كان مفرحني ان الناس كانت خارجه من العرض باللي انا عايزه .. العرض بالنسبالي مش فكرة وبس العرض بالنسبالي أنك تخرج من العرض وانت سعيد .. مالهاش دعوة لا بفكرة ولا بموضوع ولا باي حاجه .. تخرجي من العرض وانتي مبسوطه ..

** منة عامر : طيب لو حد طلب منك مثلا وقالك احنا عايزين نشوف محمد عبدالوارث في رواية رعب .. ؟

** عبدالوارث : الناس اللي متابعني والقريبين مني .. هما اللي عارفين أني في قصة كنت كتبتها من فترة .. كانت جميله جداً جداً .. وانا بداية كتباتي كلها كانت قصص رعب ..كنت كاتب حلقات مسلسله للرعب .. كانت اسمها (( الموسوم )) ..

كتبت منها حوالي 4 حلقات .. وبعدها توقفت .. وكان في قصة تانيه اسمها (( اللعنة ) دي كانت حلقات مسلسله ..وانا أغلبية قراءاتي في قصص الرعب ..

** منة عامر : بتقرأ لمين في روايات الرعب ؟

** عبدالوارث : الرعب انواع بدايات الرعب بالنسبالي (( أحمد خالد توفيق )) .. انا كنت زمان في بدايات الاستاذ (( أحمد خالد توفيق كانت روايات مصرية للجيب )) .. بختلف مع الناس في حاجه من ناحية الرعب .. الرعب مش شرط انه بالشكل الدموي اللي بنشوفو ..

 ** منة عامر : لا دلوقتي الناس مع الطفرة اللي موجوده دلوقت من الروائيين الي تميزو في كتابة روايات الرعب غيرو فكرة الشكل الدموي زي ما بنشوفو في الافلام الاجنبيه ..

** عبدالوارث : فعلا يا اشباح يا اما دم وقتل وحاجات من دي ..

** منة عامر : (( الموسوم )) كانت بتتكلم عن ايه ؟

** عبدالوارث : انا سمعت ان في دلوقت في سوق الروايات أن فيه رواية تشبه أسم (( الموسوم )) انا بقول للناس أن  (( الموسوم )) غير  ((الممسوس )) دي بتختلف عن دي تماماً انا قراءة (( الممسوس )) .. (( رواية الموسوم )) بتتكلم عن عن الجان وكانت اتفاق حصل بين انسان في عصر الخليفه (( المعتصم )) .. واحنا لو رجعنا للتاريخ هنلاقي ان الخليفه (( المعتصم )) كان بيفكر في غزو (( أوروبا )) ونجح انه يغزو (( أوروبا )) .. في عراف ذهب اى الخليفه (( وقال له استمر في غزوك لأوروبا انك سوف تنجح ورجع العراف لبيته وبعد لما رجع .. ظهر له واحد من الجان الذي كان على عهد معه وقاله له الجني .. أنت خالفت العهد معنا .. انت أخبرت ونحن اعلمناك انك لا تستطيع ان تبلغ .. فكان عقابه انه يكون موسوم .. )) يمعنى انه اي حد من نسله هيوسم باللعنه .. كلمة موسوم في اللغه هي (( واسما .. )) .. بدات الحلقات تتواصل من عصر الخليفه لحد لما وصلنا لعصرنا الحالي (( بان هناك شاب عنده 25 سنه وكان له جَد  وهذا الجَد عالم من العلماء ولم يكن يريد ان يجلس معه .. وكان جده من الاثرياء وعنده منزل كبيراً جداً .. الا انه هذا الشاب لم يعيش معه وجاء يوم والجد توفى .. وترك وصية بان حفيدة لو قدر يعيش في هذا المنزل الكبير لمدة 30 يوم .. هياخذ كل ثروته .. بيذهب لتنفيذ الوصية وبيكتشف ان هذا المنزل هو بوابة من بوابات عالم الجان ..بيقرر مابين انه يكمل او يضحي بكل شيئ بعد كل الاهوال التي يراها داخل هذا المنزل .. عرف واتعرف على اشياء كثيرة جدا في عالم الجان ..

** منة عامر : جميل أن رواية بالجمال ده تكون في بداياتك ده شيئ جميل جدا .. أنك تفكر أنك تكتب رواية بالفكرة دي.. بس ليه اخترت ان اول قصصك ورواياتك تكون رعب ..؟

** عبدالوارث : دائما قرائاتك للكتب او القصص بتأثر عليكي وبما أني قراءاتي كلها في الرعب وقرات كتير في الرعب الشرقي وليس الغربي .. الرعب الشرقي كانت فكرة ومكملتهاش ..

** منة عامر : ولية مكملتهاش ؟

** عبدالوارث : فكرة ان اول رواية ليا تبقى رعب دي حاجه كانت بتأرقني دايما .. ودي حاجه كانت بتوقفني عن الكتابه في رواية الموسوم .. كنت بحس ان مش هي دي البداية الحقيقه ليا ..دي حاجه كانت جوايا ..

** منة عامر : يعني انت كنت طموحاتك لشيئ أكبر من (( الموسوم )) ؟

** عبدالوارث : فعلا وكمان رواية اقفز انا توقفت فيها حوالي 3 شهور عن الكتابة فيها لكن حصل موقف معايا هو اللي خلاني أرجع أكتب فيها تاني وكملتها والحمد لله أتنشرت وعجبت ناس كتير ..

** منة عامر : طيب خلينا شويه نبعد عن روايات الرعب والجان .. واقفز وكل ده .. واقولك الرومانسيه في حياتك شكلها ايه ؟ ومعجبينك عايزين يعرفوا اكيد محمد عبدالوارث مرتبط مش مرتبط ؟ بما انك مخرج مسرحي وليك معجبين كتير لانك في مجال المسرح والتمثيل بقالك سنين .. وشاب في سنك بيخرج ويألف ويشتغل ويدرس .. الرومانسيه واخده في حياتك مكان مع كل ده ولا لا . .؟

**عبدالوارث :  الرومانسيه في حياتي  .. بصي مبدأياً انا لو قلت رأئي في الرومانسيه والحب كل البنات هيكرهوني .. لان فكرة الارتباط بالنسبالي فكرة (( كوميديه ))

** منة عامر : كوميدية !!!! ؟؟؟

** عبدالوارث : فكرة كوميدية جدا بحته.. بس لو رجعنا للروايات بتعتي هنلاقي فيها أجمل خيط رومانسي موجود ..

** منة عامر : ليه فكرة الارتباط معاك مرتبطه بالكوميديا ؟

** عبدالوارث : انا مش عارف انا واخدها كده ليه .. بس افورة التفاصيل اللي بتحصل في اوقات الارتباط هي اللي بالنسبالي بتاخد شكل كوميدي ..

** منة عامر : أديني مثال نوضح للناس اكتر وجهة نظرك .؟

** عبدالوارث : يعني مثلا لو واحده وواحد اتعرفو على بعض وهي متعوده كل يوم .. تبقى بره بيتها لحد الساعه 8 بليل وهي وهو اتعرفو على بعض من مجموعه اصدقاء  وهو وهي موجودين في مجموعه مع بعض وكلهم بنات وهي عارفه وموجوده وشايفه وكانت معاه وترجع تقولو انت كنت واقف ليه معاهم ؟؟

.. ده بالنسبالي كوميديا .. وده اغلبية اللي بيحصل في مصر ان الولد والبنت يتعرفو على بعض عن طريق مجموعه من الاصدقاء وترجع تحاسبو بعد ما يرتبطو ببعض .. حاجه تانيه من اللي بتخليني اقول على العاطفه الزياده انها كوميديا .. ومع تحيزي الشديد لجانب الرجاله ..

** منة عامر : تحيزك الشديد لجانب الرجاله ؟؟

** عبدالوارث : فعلا لانهم بيعانو جدا الفتره بتاعت الارتباط دي مع زيادة العاطفه اللي من وجهة نظري بتقلب بـ كوميديا .. زي مثلا لو قالها (( مالك ؟ .. مضايقه ! من ايه ؟ .. ما انت لو كنت بتحبني كنت عرفت انا مضايقه من ايه ))

** منة عامر : هههه .. لا بس على فكرة مش كل البنات كده في بنات كتير اعقل من كده ...

** عبدالوارث : معاكي في ده بس انا مش عراف عشان اعرف هي مالها او مضايقه من أيه ..انا بعرف امثل رومانسي كويس .. بعرف أكتب رومانسي كويس .. لكن حياتي مافيهاش رومانسيه خالص لحد دلوقت .. وهو ده كل الموضوع من ناحية الجانب الرومانسي في حياتي ..