لقاء مع أديب 2000- مصطفى إسكندر

لكل حاجه حدود ولكل حب حدود ولكن مع الإسكندر كان كل شيئ مالوش حدود .. من حب وعشق .. وذكريات حلوة مبتتنسيش .. 

النهاردة في اللقاء الخامس لفقرة ( لقاء مع أديب 2000 ) هنقابل اللي مايعرفش للمستحيل عنوان .. واللي كان دايما بيحلم باللي فات انه يتحقق .. معانا النهاردة شاب من شباب مجلة أدباء 2000 .. الواعدين العاشق للصعاب معانا ( مصطفى إسكندر )

** منة عامر : اهلا وسهلا بيك في لقاء مع أديب 2000 ..

** إسكندر : أهلاً وسهلا بحضرتكِ ..

** منة عامر : نورتنا ويشرفني اللقاء مع شاب زي مصطفى إسكندر مميز بكلماته ..

** إسكندر : الشرف ليا طبعاً .. اني اكون من ضمن اللقاءات الاول لمجلة اتوقع انها تسمع ف الوسط ان شاء الله وبمده قصيرة ..

** منة عامر : شكرا ليك .. البداية طبعاً لازم تبقى زي اي بدايه .. بس عشان فضولي وأكيد فضول ناس كتير عندك على الفانز بيدج بتعتك .. اول حاجه هسألهالك .. عن كتاب لأجلها؟

** إسكندر : من أجلها .. دا طبعاً حلم قريب اتولد جوا عقلي وبنى هدف لي من فتره والهدف بيكبر كل يوم ومستني ان شاء الله اشوفه ف المكتبات قريب أوي زي ما انتو مستنين بالظبط .. كتاب هتلاقي فيه كل حاجه تلمسك من خيال وخواطر من مشاعر زيادة متأكد إن شاء الله هيعجبكم زي ما عجب ناس كتير "عاشق لكل الصعاب" اللي كانت جزء من الكتاب..

** منة عامر : لو قولتلك عرف الناس على مصطفى إسكندر بعيداً عن شخصية الكاتب والشاعر هتقول كل الحقيقه عن شخصيتك ولا هتتجنب العيوب اللي فيك .. مع الاحتفاظ اننا كلنا عيوب بس انت عندك الشجاعه انك تحكي لمعجبينك عنها ؟

** إسكندر : طبعاً كل واحد فيه الحلو والوحش .. كل واحد فيه اللي بيعجبه ومبيعجبش الناس والعكس برضو .. ف بإختصار هقول .. مصطفي هو زي ما أي حد بيشوفه .. مصطفي هو شخص واحد مش هيفرق كاتب من وزير من رئيس .. زي ما بتشوفه ف اي مكان هو دا الشخص الوحيد .. مش بحب اكون بشكلين طالما انا عاجب نفسي كدا ..

سواء في اللي اتفق معايا او خالفني الرأي أنا هو دا الشخص الطبيعي ف حياتي..

** منة عامر : يعني بتاخد رأي الناس فيك بعين الاعتبار ولا مش بتهتم برأئي الناس فيك ؟. طالما أنك عارف نفسك كويس ؟

** إسكندر : والله النقطة دي بتختلف من حيث الموقف والظروف اللي ممكن تتغير .. أكيد بحب اسمع رأي الناس فيا وأكيد بحب اشوف هما شايفني ايه بعيونهم .. لكن مش ف كل المواقف .. في مواقف بيكون انا رأي واحد مش هيتغير عشان مقتنع بيه تماماً لكن في مواقف تانيه ممكن اغير رأي عشان شايف وجهه نظر الشخص اللي قدامي فيها نسبه كبيرة صح ..

ف أكيد باخد بعين الأعتبار وبهتم برأي الناس .. مش معني اني شايف نفسي كويس يبقي مهتمش برأي حد .. لا لازم اهتم برأيهم عشان اصلح الغلط..

** منة عامر : ايه اللي خلاك تمسك قلمك وتبدأ في الكتابه من 4 سنين ؟

** إسكندر : هو من أربع سنين اللي أقدر أقول اني بدأت أكتب كويس .. لكن من قبل كدا فعلاً كنت بكتب في حاجه ف الكتاب كنت كاتبها من الأعدادي وصممت اني اضمها للكتاب عشان مفرحاني ..

مسكت القلم وصممت اني اكتب لأن لقيت القلم بيطلع احساس مركون جوا القلب .. بيظهر عواطف ممكن تلاقي صدي ليها ف قلوب ناس تانيه .. بحس فيه خيال وهدوء وراحه .. بحس اني ممكن اعيش برا عن الضغوط والمشاكل اللي ممكن تقابل الشخص ف حياته .. للسبب دا أنا مهتم وهفضل مهتم بالقلب والاسكتش عشان اعبر عن اللي ف القلوب وأكيد عن اللي جوايا .. بس مش شرط كل شيئ بكتبه بيكون بيعبر عن حالتي ..

** منة عامر : انت قلت دلوقت ان مش شرط انك بتكتب كل حاجه بتعبر عن حالتك .. بس نفس الوقت بتعبر عن اللي جواك .. يترى  { مسك عيونها  } حفر جواك ذكريات وجوا قلبك من أمتى .. من زمان ولا من اول ما حسيت أنك المفروض تكتب لأجلها ؟ هل هي تستحق أنك تكتب لأجلها ؟ كل الكلام الحلو ده ..؟ احكلنا عنها ؟

إ

** إسكندر : من أجلها هي ليس من أجل آنثي غيرها .. تستحق كل السهر وكل الخيال .. اركض ورائها ك فاررس يبحث عن قافلته الهوجاء .. من أول يوم شوفتها وكان ليها مكان ف قلبي .. بكتب ليها من اول ما عرفتها عشان حركت كل اللي ساكن جوا .. أكيد تستحق .. ما بالك ب روح جواك بتحرك فيك كل شئ  .. مفيش كلام يوصفها كفايه انها "روح" وركزي شويه ع كلمة روح .. عشان الروح مهما كانت بعيده عنك بمسافات ف هي برضو جواك ساكنه .. مهما بعدت البلاد وقل الكلام وانعدم كل شئ ف هي هنا ف القلب تسكن وفي الجسد تعيش ..

هي " روح" ...

** منة عامر : طيب لو ركزت في معنى كلمة ( روح ) .. وقارنا اشعارك اللي كتير منها بتتكلم عن البعد والمسافات بينك وبين روحك .. يترى ايه الفرق بينك وبين روحك ؟

** إسكندر : بإختصار شديد جداً .. بخاف علي روحي مني ..

** منة عامر : يعني أنت خايف عليها منك ؟

** إسكندر : أكيد بخاف علي روحي من كل شئ حواليها ولو حتي مني .. دي أمانة وجنة وهدية ربنا ف الأرض ^^..

** منة عامر : لما بيجي عليك الليل بعد يوم شغل ومرهق .. وتفرد جسمك على سريرك وسط اوراقك وكتبك اللي بتقراها وبتدرسها .. وتحط أيدك ورا رقبتك وتغمض عينك .. يترى بتحلم ب أيه وتفكر في أيه وقتها ؟

** إسكندر : الحلم الكبير اللي هو جزء مني بقاله اربع سنين برضو .. بس هخليه سر بيني وبين نفسي لحد ما يتحقق وهقول عليه ..

بس التفكير بيكون أكيد بعيد عن الضغوط للي بمر بيها طول اليوم .. بفكر ف سيدة النساء .. و روح أفكر في الحروف وهي تطير بين ظلمات الغرفة .. امسك بين يدي عمري المهيم بالعشق .. وانصت لهمهمته فلا بديل عنه وقت الصمت والسكون

** منة عامر : ليه عاشق للصعاب .. ايه الصعب اللي مصطفى إسكندر واجهه في حياته خلاه يكتب بقلمه انه عاشق للصعاب ؟

** أسكندر : الصعب اللي قابلته كتير .. كتبت عاشق لكل الصعاب عشان الصعب وقتها كان حُبها .. مكنتش عارف احبها ازاي وامتي وفين .!

عاشق لسهولتها اللي هي صعبه .. صعب الجمال ف عيونها .. صعب النظر للأمان والحُب .. هقول حاجه قالها نزار " أحبك جداً وأعرف أني أعيش بمنفى .. وأنتِ بمنفى

وبيني وبينكِ.. ريحٌ .. وغيمٌ .. وبرقٌ .. ورعدٌ

وثلجٌ ونـار .. "

وبعد كل اللي قاله انا برد عليه و أقوله " عاشق لكل الصعاب لكني بحبكِ بإمتناع "

** منة عامر : ذكرياتك هي كل حياتك. .. ولا أنت شايف أن اللي فات مش الأحسن ونفسك تعمل الأحسن في اللي جاي ؟

** إسكندر : أكيد لازم تكون الذكريات مقتحمة أكبر جزء من حياه الشخص ولكن برضو في مساحه تانيه للي جاي عشان نشكل مستقبل ويكون فيه احسن من اللي فات او بقدر اللي فات من كل شئ لو محققناش احسن .. بإختصار " الشخص بدون ذكريات هو شخص ميت مستقبلياً "

** منة عامر : جنة مصطفى إسكندر لو دخلناها ايه اللي ممكن نلاقيه جوا الجنة دي ؟

**  إسكندر : هتلاقي ورق كتير مكتوب علي كل ورقه تاريخ وساعه .. هتلاقي كل ورقه فيها كنز بالنسبالي من مواقف واشخاص ف حياتي  .. هتلاقي أميرة الجنه " روح "

مبتسمة الوجه بأحسن ثياب القلب .. موسيقي الهدوء .. هتلاقي الصمت وكلام العيون .. فيها حاجات كتير بس ممكن ف دقيقة هتلاقي الدنيا مقلوبة عشان بتعتمد بشكل رئيسي علي الحاله النفسية ..

** منة عامر : بتحب تسمع لمين ؟ والغناء الصوفي ليه مكانه في حياتك وبتسمعه ولا لا ؟

** إسكندر : هنعد كتير كدا .. أولهم ومن صغري أحب وجداً " كاظم " لانه بكل بساطة مشكل جوايا كلام كتير ..  بعد كدا هيبقي في كتير عربي وانجليش ..

الغناء الصوفي اعشقه فعلاً

** منة عامر : بحيك على اختيارتك للموسيقى ولنوعية الغناء الراقي  ..

** إسكندر : الرقي ف كل شخص .. بس اللي بيهتم بيه بيظهر أكتر عليه..

** منة عامر : بتقرأ لمين من الادباء ؟ ومين اللي أتأثرت بيهم في اشعارك وكلماتك ؟

** إسكندر : بداية " محمود درويش - مصطفي محمود - نزار قباني " دول لوحدهم معزولين عن اي حد تاني بداية من صغر سني وانا بقرأ لهم .. يأتي بعد ذلك الحاليين في المجال" أحمد خالد توفيق " .. الشعر مش لاقي تأثير كبير علي كلامي قد " نزار قباني "  وممكن *  امل دنقل " .. ولكن دا مش يمنع  ان حاليا في ناس كتير موهوبه وبتأثر ولكن مش بشكل كبير .. بصراحه حالياً مش مطلع علي كتير منهم عشان في ناس مش واخده حقها انما التأثير الكبير كان من خلال أول تلاته ذكرتهم .. وحاليا في بس بأحجام متفاوته ..

** منة عامر : مصطفى إسكندر .. راضي عن نفسه وعن نجاحه لحد دلوقت ؟

** إسكندر : لحد دلوقتي لسه محققتش اي شئ بالنسبالي .. عشان انا بعتبر نفسي لسه في البداية خالص .. لأن اللي في أحلام وطموحي أكبر من بدايات .. ولكن ك بداية هنقول راضي ولكن في اكتر ان شاء الله..

** منة عامر : أخر سؤال في لقائي مع إسكندر العشق الروحي .. أيه اللي ضاع جواك .. ومش لاقيه لحد دلوقت ؟

** إسكندر : مقدرش أحدد بصراحه . لكن اللي ضاع " روح " وجدته فيا بعد ما كان ملهوش وجود ..

** منة عامر : وكلنا بنتمنى أنه مش يضيع تاني وبنتمنالك النجاح في حياتك وشخصيتك وكلامك بيدل أنك هتبقى شاعر وكاتب كبير في المستقبل أن شاء الله .. انتهى لقائي معاك وأن شاء الله لينا لقاء ثاني بعد نزول كتاب لأجلها ..

** إسكندر : أحب طبعاً أشكركِ علي اللقاء الجميل دا كنت مبسوط جداً .. متميزة فعلاً انتِي ومش بحب أجامل .. وان شاء الله تكون مقدمة أو مذيعه جيدة جداً .. وأحب أنوه للكل أن ان شاء الله المجلة دي هيكون ليها اسم كبير ف وقت قصير ان شاء الله ..

** منة عامر : انا اللي بشكرك أنك سمحتلي اني اسألك كل الأسئلة دي  .. وسمحتلي باللقاء الحلو ده جميل كلامك كله وأحنا بنتشرف بنشر كلماتك الجميله في عشق روح .. لمجلة أدباء2000

** إسكندر : الشرف ليا طبعاً ^^

** منة عامر : كلنا بنشجعك وبنحييك على كل مؤلفاتك ومنتظرين الكتاب وان شاء الله كل الناس تقراه ..

** إسكندر : ان شاء الله <3

** منة عامر : أنتهت فقرة لقاء مع أديب 2000 وانتهى لقائنا مع إسكندر العشق الروحي ( مصطفى إسكندر ) بنتمناله التوفيق والنجاح في حياته .. انتظرو المزيد من اللقاءات القادمه مع أدباء2000 ...