لقاء مع أديب 2000 - محمد مجدي يوسف

-

لقد جاء المبعوث .. لقد أتى من (( عنبر  9 )) .. ليأخذنا الى ((  المتجر )) .. ويحذرنا من (( الزواج به سمُ قاتل )) .. لنقضي مع (( 45 

يوم )) . بداخل (( جولة في ميدان التحرير لتقصي الحقائق )) .. معانا في لقاء مع أديب 2000 النهاردة المبعوث (( محمد مجدي يوسف )) .. اهلا بيك معانا ..

** محمد مجدي : أهلا بيكى وبأدباء 2000 ..

** منة عامر : اهلا ييك يا استاذ محمد .. اتشرفنا بيك ولقائنا يارب يكون عند حسن ظنك بينا .. ان شاء الله ..

هنبتدي من البدايه خالص من قبل المبعوث ليك قصص جميله قبله طبعا المبعوث هنتكلم عنه بس احكلنا عن بدياتك ؟..

** محمد مجدي : البداية كانت تقريبا من وأنا فى الجامعة من 8 سنين تقريبا لما كتبت رواية كانت زى روايات ملف المستقبل كنت متأثر جدا ب ( نبيل فاروق ) ، وبعدين كتبت أول قصة نشرتها مع دار ( الروضة ) بعنوان (إلى متى) وبعدين مع نفس الدار قصتين تانيين (احذر الزواج به سم قاتل - المسرح ) بس لأن الدار مغمورة مافيش حاجة من القصص دى ظهرت.. دى كانت بدايتى مع الكتابة..

** منة عامر : يعني في مشوار ال 8 سنين اللي فاتت تعبت في أنك تنشر روياتك ولا كان كل حاجه متيسره ولا واجهتك مشاكل في النشر ؟

** محمد مجدي : بالنسبة للقصص كان فيه مسابقة لاختيار كتاب شباب قدمت فيها وظننت أنى كسبت لكن اكتشفت بعد كده أنهم خدوا كل إللى قدم والعملية كانت عبارة عن لم فلوس وخلاص ، أما بالنسبة لرواية المبعوث كان الأمر مش صعب إطلاقا ، كنت اتعرفت على أ/ حسام مدير دار (ن) عن طريق  (( محمد جلال )) و ((  حسن الجندي )) ، فكان هو أول شخص أفكر فيه أبعتله الرواية وتم قبولها بعد تقييمها وتم النشر بدون أى صعوبات ، إللى لقيت فيه صعوبات فعلا ولسه موجودة الصعوبات لغاية دلوقتى موضوع السيناريوهات ، تسويق سيناريو سواء لفيلم كتبته أو مسلسل ..

** منة عامر : طيب بما انك مواجهتش صعوبات في نشر اول رواية ليك أنت بتنصح الشباب المبتدأين ب ايه من وجهة نظرك في موضوع النشر ؟

** محمد مجدي : هو أنا بعتبر نفسي مبتدئ فمعتقدش أنى مؤهل أنى أنصح حد ، لكن ممكن أقول أن أهم حاجة فى النشر من وجة نظري أنك تختار دار نشر تكون معروفة بإنها دار محترمة وهتقدر عملك ، ولو انت واثق في عملك يبقى ماتدفعش فيه مليم علشان تنشر العمل ده حتى لو كان ده عملك الأول ..

** منة عامر : احكلنا عن عنبر 9 وامتى وفين كتبتها وجتلك الفكرة ازاي ؟

** محمد مجدي : عنبر 9 تعتبر جت بالصدفة .. كانت فيه مسابقة د. إيمان الدواخلي بتعملها كل سنة ، كانت المسابقة المرة دى عن قصة يكون البطل فيها مكان مش شخص، فقررت أنى أكتب قصة البطل فيها عنبر فى مستشفى الأمراض العقلية ، وبدأت كتابة ، لكن القصة خدتني لمكان تاني وطريق تاني غير إللى كنت ناوي أعمله ، أعجبت بيها على كده ونزلتها على الفيس بوك بعد كده..

** منة عامر : طيب ومغامرتك في (( جولة في ميدان التحرير لتقصي الحقائق )) ؟

** محمد مجدي : دى مش قصة ولا حاجة أدبية ، كان الموضوع ده في بدايات الثورة وكانت الأمور كلها داخلة فى بعض ومافيش حاجة مفهومة وطبعا الإعلام ولا ليه لزمة كالعادة فقررت أنزل الميدان مع أصدقاء ليا ونشوف الوضع ونكلم الناس وننقل كل حاجة قابلتنا على الفيس للمتابعين..

** منة عامر : طيب يعني انت السياسيه في حياتك ليها مكان ولا أنت شايف انك باللي عملته وقت الثورة كان من واجب وطني لا أكثر ؟

** محمد مجدي : قبل الثورة كنت بقول مافيش فايدة فى البلد.. وده بان قصة (إلى متى ) إللى نزل قبل الثورة بشهور .. فكانت السياسة مالهاش أى مكان لأنى مقتنع أن رأيي مش هيفرق.. وقت الثورة حسيت أننا ممكن نغير حاجة فنزلت مع الثوار طول الوقت تقريبا واهتميت اني أتكلم في السياسة على أمل ان حاجة تتغير .. لكن بعد فشل الثورة في رأيي .. رجعت زى الأول السياسة ماهي إلا مسرحية بتفرج عليها من بعيد وبضحك ..

** منة عامر : نتكلم بقى عن المبعوث وازاي بداتها ويترا اخدت منك وقت قد ايه وجتلك فكرتها ازاي .. واحترت في اختيارك للأسم ولا انت كنت مقرره ؟

** محمد مجدي : الأول قررت أني أكتب رواية، ودي كانت خطة صعبة، وبما أني بحب الرعب ومجال الرعب ، ففكرت أنى أكتب حاجة متعلقة بالجن، وبدأت أكون فكرة الرواية وابحث عن معلومات ممكن تفيدني، بس مضيعتش وقت فى البحث أنا بدأت أكتب على طول ، وكل فترة كنت بوقف شوية علشان أبحث عن معلومات جديدة تفيدني، وكمان أنا كنت كتبت البداية وسيبت الرواية تاخدنى مطرح ما تروح لغاية ما خلصت، ومن إللى ساعدونى فى المعلومات الكاتب حسن الجندي والكاتب عصام منصور ده غير الناس الكتير إللى حمسونى أكمل فى الرواية لغاية ما ظهرت زى زوجتى/الكاتبة/ الدكتورة شيماء عبادي إللى كان ليها دور كبير جدا فى أنى أكمل الرواية ، وأيضا الكاتب ياسين أحمد سعيد وغيرهم كتير من الأصدقاء

الرواية خدت مني سنتين تقريباً.. بالنسبة للأسم أنا قررته بعد ما كتبت أول فصلين أو تلاتة بعد ما الفكرة بدأت تكتمل فى دماغي..

** منة عامر : لو اتوجهلك نقد من ناقد أدبي قرأ رواية المبعوث  وحسيت انه بيهجمك فيه .. هتتقبل النقد بصدر رحب ولا هتعمل ايه في موقف زي ده ؟

** محمد مجدي : ممكن تدخلي على الجود ريدز وتشوفي الهجوم وردي عليه ..الحمد لله بتقبل النقد وبتعلم منه مهما كان وبحترمه حتى لو كان مش نقد بناء ، في رأيى أن الكاتب أول ما ينزل الرواية بينتهى دورة هنا ، والرواية بتبقى ملك الناس يعملوا بيها إللى هما شايفينه صح من وجهة نظرهم ، وأنا ككاتب أتعلم من أخطائي إللى هما ممكن يوجهوني ليها مهما كان أسلوب النقد.. وفى صفحة الرواية أنا بنزل الآراء إللى بتجيلي سواء سلبية أو إيجابية :)

** منة عامر : يعني من خلال فقرة لقاء مع أديب 2000 بنقول أن محمد مجدي يوسف لازم كل الشباب يتاخذوه قدوة في تقبل اي نقد بصدر رحب سواء كان سلبي او إيجابي ..

** محمد مجدي : ههههههههههههه لا لا مش لدرجة قدوة، دى كبيرة أوي، كل الحكاية يتقبل الرأي الأخر منغير أى قدوة ولا حاجة .. وكمان رواية المبعوث  حابب أنوه عن حاجة ، أنا قولت أنى بحب الرعب فكتبت عن حاجة ليها علاقة بالجن، لكن الرواية خادتنى فى طريقها فطلعت فانتازيا/رعب/فلسفة .. خليط عجيب.. ..

** منة عامر : محمد مجدي بيحضر ياترى بيحضر للرواية جديده دلوقت ولا منتظر بنات افكاره ؟

** محمد مجدي : بكتب فعلا في رواية جديدة بس لسه بدري عليها ...

** منة عامر : طيب ماينفعش تقولنا نبذه عنها ؟

** محمد مجدي : لسه أنا في أولها والأمور مش واضحة بس غالبا هتبقى في نفس الخط .. فانتازيا/رعب/فلسفة

** منة عامر : طيب أخر سؤال معانا في لقائنا الممتع ده .. شايف أنك بكدة راضي عن نفسك بعد نشر اول رواية ليك (( المبعوث )) وحاسس أنك بكدة حققت نجاح لا بأس به .. ويترى حاطط خطط للمستقبل واهداف وبتنفذها في الوقت الحالي ولا لا ؟

** محمد مجدي : أكيد أني أنشر رواية وأنها توصل للطبعة الثانية في خلال شهرين أو تلاتة بس ، ده نجاح لا بأس به بالنسبة لأول رواية، بس أكيد مش طموحي اللي نفسي أوصله ، هدفي أني استمر فى الكتابة وأن  مستوايا الأدبي يرتقي من عمل للأخر .. وبسعى على قد ما اقدر لتحقيق الهدف ده.. وطبعا نفسي أحصل على جوائز عالمية زى البوكر ونوبل والشيخ زايد وغيرهم .. مجرد تمني يعني. ..

** منة عامر : واحنا كلنا بنتمنالك أنك تنول الجوايز دي وأن شاء الله تحوز عليها بمجهودك وافكارك بنتمنالك التوفيق دايما ونورتنا وشرفتنا في لقاء مع أديب 2000 وشرفت مجلتنا المتواضعه باللقاء الحلو ده  ومنتظرين كلنا كل روايات جديده من المبدع المبعوث (( محمد مجدي يوسف )) ويارب اكون كنت محاورة خفيفه على قلبك ...

** محمد مجدي : الشرف ليا ولوجودي معاكوا النهاردة.. ويارب أنا إلى أكون عند حسن ظنكوا وظن القراء.. شكرا ليكي ولأدباء 2000  ..

** منة عامر : .. خلصت فقرة لقاء مع أديب 2000 ويارب تكونو استمتعتم في حلقتنا النهاردة مع المبعوث (( محمد مجدي يوسف )) .. انتظرونا والمزيد من اللقاءات مع الكثير من أدباء 2000 ..